AH&Vety-in vawk thi phûm zel turin chah

AH&Vety department chuan vawk natna, PRRS chungchanga mipui hriat tur pawimawhte an tarlang a, "PRRS vei vawk thi leh damlo reng reng ei tura sâwngbâwl loh tur a ni a, vawk thi chu thûk taka phûm zel tur," an ti.

AH&Vety department chuan, PRRS hri lêng dona kawngah theih-tawpa hma an lak thu tarlangin, "Hmun pawimawh zual nia hriatah quarantine camp leh check post din a nih theih nan state sorkar leh sorkar laipuiah theihtawpin hmalak reng a ni a, thawktu pawh dil belh a ni," an ti a; ran damlote rang leh mumal zawka enkawl a nih theih nan department-a post ruak awmte hnawhkhat turin hma an lak mek thu an tarlang.

PRRS hri lêng vanga vawk vulha eizawngtute'n harsatna nasa tak an tawh zel loh nan sorkar leh mipuite ṭanho ṭhat a ṭul thu sawiin, Vety department chuan, "Sorkarin PRRS tirêm tura hma a laknaah mipuiin ṭha taka an ṭawiawm a pawimawh," an ti.

PRRS chungchanga hriat turte

1. PRRS vei vawk thi leh damlo reng reng ei tura sawngbawl loh tur. Vawk thite thûk taka phûm zel tur.

2. Vawk chi thlah chhawng turin PRRS vei tawh reng reng an dam ṭha leh a nih pawhin hman loh tur.

3. Vawk damlo/thi an awmin Vety department awmna hnai berah report vat tur.

4. Ran hrisel ṭha tih hriat chian chauh lei ṭhin tur. Ran lei thar reng reng, ranvulh laite nen dah fin mai loin ni 30 tal dah hran tur.

5. Vawk-in leh a vel leh hmanruate damdawi (disinfectant) hmangin silfai ṭhin tur.

6. Vawk-in ft. 5-ft. 10 vela hláa hung kual a ṭha.

7. Vawk talhna thli leh sa chhe paih reng reng fai taka then a, phûm zel a ṭha.

8. Ran damlo hralh loh tur. Ran thi tawh phei chu hralh hauh loh tur a ni.