Bána Kaih Scheme hi mipui moral siamṭhat tumna policy a ni - CM

Chief minister Lalduhoma chuan, a kaihhruai sorkar flagship programme, Bána Kaih (Handholding) Scheme chu mipui moral (rilru sûkthlêk) siamṭhat tumna a nih tel thu a sawi a; sorkar flagship programme chu ngaih pawimawh hmasakah nei zel turin MCS officer-te a chah.

CM Lalduhoma hian nimin khan Aijal Club-a Mizoram Civil Service Association (MCSA) General Conference a hmanpui a; September 19, Ningania a tlangzarh tâk Bana Kaih Scheme chu ngaih pawimawh hmasaka nei zel tura MCS officer-te chahin, "Bana Kaih Scheme hi ei leh bara hmasawnna mai ni loin, mipui moral thlenga siamṭhat tumna policy a ni," a ti.

MCS officer-te chu thatho taka kalphung thar tuipui tura ngenin Chief Minister chuan, "State dang ûm phak turin i ṭang ang u. MCS officer-te hi mi dangte kaihruaitu tur ber in ni a, entawn tlakin in awm tur a ni," a ti a; civil dervice hna chu a zauh avangin tawnhriat leh thlir dan zau zawk an neih ṭhin thu a sawi.

CM Lalduhoma chuan, langtlang leh mi tin huapzo rorelna chu cilvil service kalphung awm sa a nih thu sawiin, "Sorkar thar hian a ngai pawimawh hle. Technology hmanga chung thilte chu nasa zawka kalpui theih a ni a, kan uar deuh deuh dawn nia. A hun laia mithiam ber berte in ni," a ti a; an theihna leh thiamnate ram tan hlan tur leh nasa zawka mipui rawngbawlpuiah MCS-te a sáwm.

Sorkar hnathawk pawl hrang hrangte a kawm tawh aṭanga a hmuh danin, a hnuai lama thawktute'n ngaihthah an hlawha a hriat thu sawiin Lalduhoma chuan, "Kan thawhna hmun ṭheuhah kan hnuai leh kan chunga mi dangte nena thawhhona ṭha tak siam hi officer ṭha awm dan tur a ni a, hemi chungchangah pawh hian MCS-te chu hmahruaitu in ni zel dawn nia," tiin a chah.

Chief Minister hian thu a sawi zawhah MCSA magazine RAHBI (10th Edition) chu a tlangzarh nghal a ni.

MCSA president V Lalengmawia pawhin thu sawiin, "Transfer and posting-ah thuawih takin kan kal ṭhin a, harsatnate pawh awm ve thei. Sorkar hnathawk kan nih chuan khawi hmunah pawh kal thei kan ni tih kan hriat a ngai," a ti.

Sorkarin convergence a uar chho dawn tih sawiin MCSA President chuan, "Hei hi tun hma aṭanga kan tih theih ṭhin loh, kan nghahhlelh em em a ni," a ti a; Bana Kaih Scheme tihlawhtlingtu ni tura theihtawp chhuah turin MCS officer-te a chah a ni.

MCSA CONFERENCE RESOLUTION

▶ Fostering Economic Empowerment and Inclusive Growth in the State- Government’s flagship programme ‘The Mizoram Bana Kaih (Handholding) Scheme’ hi ṭha kan ti a, champion-pui ngei turin kan awmna hmun ṭheuhah theihtawp kan chhuah ang.

▶ Upgrading Public Service Delivery: Investing in District, Sub-Division and Block Administration Infrastructures. Mipuite hnena essential service ṭha zawk pek a nih zel theih nan district, sub-division leh block-a hmasawnna ruhrel, tun aia tihchangkan a nih theih nan sorkarah thlen ni se.