CYMA hruaitute'n NH siam mek an tlawh

Central YMA hruaitute chuan nimin khan Sairang-Kolasib inkara national highway kawngpui chhia siam mek an tlawh a; kawngpui siam leh a kaihhnawih chungchangah Kolasib Bawrhsap an kâwm nghal.

CYMA hruaitute hi president Lalhmachhuana hoin member 13 an thawk chhuak a, Zoram Drivers Union hruaitute'n Khamrang-Kawnpui inkarah an ṭawiawm a; Mizoram mamawh châwk luhna kawngpui ber lirthei tlân theih loha a chhia leh khâr hial ngaia a awm chu pawi an tih thu an tarlang.

Mizoram hmun hrang hranga kawng chhia chungchang leh hma la tura ngenna CYMA hruaitute'n Chief Minister leh sorkar thuneitute hnenah an thlen tawh ṭhin tih sawiin CYMA chuan, "Kan kawngpui pawimawh khâr hial khawpa sorkarin a siam ṭhat hna a kalpui mek chu a hmunah kan zuk en a ni," an ti.

CYMA hruaitute hnen aṭanga thu dawn danin, CYMA hruaitute hian Khamrang leh Kawnpui inkara kawng siam mek tlawhin, hna thawk mektu department hotute kawng siam chungchang an sawipui a; Mualkhang, Khamrang leh Kawnpui branch YMA hruaitute nen hmalak tawh dante an sawipui bakah, YMA Sub-Headquarters, Kolasib hruaitute an sawipui bawk.

Nimin tlai dar 4:30 khan Kolasib DC meeting hall-ah CYMA hruaitute leh Kolasib Bawrhsap ten NH kawngpui khâr leh sorkar hmalaknate an sawiho a ni.