Aizawl khawpui bawlhhlawh paihtute'n September 23 aṭangin an paih dawn lo

Aizawl bawlhhlawh paihtute chu bawlhhlawh paih lirthei hman man siamṭhat phûtna tihhlawhtlin a nih loh avangin September 23, 2024 (Thawhṭanni) aṭangin tiam chin awm loin an ding dawn a, bawlhhlawh an paih dawn lo.

Aizawl Garbage Truck Owners’ Association, PPP Mode Bawlhhlawh Paih Welfare leh Sanitation Driver & Handyman Association hruaitute chuan nimin khan Aizawl Press Club-ah thuthar thehdarhtute an kâwm a; bawlhhlawh paih lirthei hman man chu rualkhai leh mumal zawk, veng hlat dan mila siam ṭhat an phût thu sawiin, an phût chu tihhlawhtlin a nih loh avangin bawlhhlawh an paih dawn loh thu an puang a ni.

Bawlhhlawh paih motor hman man bithliah dan a mumal loh avangin siam ṭha turin AMC hotute hnenah October 2019 aṭangin vawi eng emaw zat ngenna an thlen tawh thu sawiin pawl pathum hruaitute chuan, "Veng hrang hrang hlat dan mil pawh ni lo, kilometer-a chhûta rate inang lo tak mai kan hmang mek a, a pawi kan ti hle. Motor enkawlna senso sang zel nen, rate mumal lo tuartute tan a beidawnthlak tawh em avangin bawlhlawh paih motor zawng zawng dinga rate siam ṭha tura nawrh hial a ngai ta hi a lungchhiatthlak hle a ni," an ti.

Pawl pathum hruaitute tarlan danin, bawlhhlawh paih motor hman man hi a hlat zawng, kilometre zat hisápa chhût leh siam a ni lo a, AMC hotute'n veng hlat dan ngaihtuahin a àwm tâwk an bithliah tawp a ni.

Kum 2020 khan motor hman man chu trip khat zelah Rs 50-in tihsan a ni a, kum 2021 tawp kamah 5% ṭheuhin tihsan leh a ni. July 23, 2024-a AMC Executive Councillor ṭhukhawmin veng 16 chauh huapin motor hman man a tipung leh hret an rêl bawk.

AMC-ah local council 85 an awm a, bawlhhlawh paih lirthei 151 hman a ni a, chungte chu LMV (pick-up leh a tlukpui) 69 leh MMV (LPK 407 leh a tlukpui) 82 a ni. Bawlhhlawh paih man hi AMC-in 60% tumin, local council-te'n 40% an tum a; AMC-in a tum hi LC account-ah an thun a, AMC-in bawlhhlawh paih lirthei neitute hnenah LC-te'n anmahni tum tur nen a hlawmin an pe ṭhin.

Aizawla local council 85 zinga 74-in LMV lirthei hmangin bawlhhlawh an paih a, AMC bithliah anga bawlhhlawh paih man chu Rs 1,210 aṭanga Rs 2,000 inkar a ni. Solid Waste Management Centre, Tuirial aṭanga veng hrang hrang 74 hlat zawng chu km. 12 leh 29.9 inkar a ni thung. SWMC aṭanga veng hrang hrang hlat zawng leh motor hman man chhûtin, lirthei hman man chu veng ṭhenkhatah km. 1-ah Rs 100.83-te a nih laiin veng ṭhenkhatah Rs 60.28-te a ni a; rate inang lo 63 a awm.

MMV lirthei hmanga bawlhhlawh paih veng 73 an awm a, AMC rate anga MMV-a bawlhhlawh paih man chu Rs 1,730 leh 2,700 inkar a ni a, veng hlat zawng chu km. 13.1 leh 29.9 inkar a ni. Veng hlat zawng leh motor hman man km. khat anga chhûtin a sang ber Rs 132.06 a nih laiin a tlem ber Rs 89.43 a ni a; km. khat rate anga chhûta rate inang lo 62 a awm a ni.

Bawlhhlawh paihtu pawl pathumte hian bawlhhlawh paih man siamṭhat an phût chungchang hian, State Transport Authority rate ang tala behchhan mumal neia siamṭha turin July 29, 2024 khan AMC-ah lehkha an thehlut a, an ngennain awmzia a neih loh chuan August 5-ah flag dum târ an tum thu an thlen nghal. mahse, AMC Ward VI by-election dawn hnaih a nih avangin kan ṭhulh leh rih.

September 6-ah Chief Minister Office-ah leh UDPA Minister Office-ah an thil phût leh flag dum tar an tum thu an thleng leh a; AMC aṭangin hmalakna a awm loh avang leh state sorkar aṭangin hmalakpuina a awm loh avangin September 9 aṭang khan bawlhhlawh paih motor-ah flag dum an tár ṭan a ni.

Pawl pathumte chuan bawlhhlawh paih motor hman man chu siamṭha a, kilometre zat mila siam turin thuneitute an phût tih sawiin, "Veng hla leh hnaite duhsak bik nei loa rualkhai taka siamṭha turin AMC-a kan hotu, thuneitute kan phûtin kan beisei tlat a ni," an ti a; an hmalakna chu hrethiama thláwp turin Aizawl mipui an ngen bawk.