Tuialhthei phur lirthei tlân phalsak tawh

Mizoram Oil Tanker Drivers' Association (MOTDA) leh Petroleum Entrepreneurs' and Transporters' Union of Mizoram (PETUM) chuan thuchhuah siamin, Kawnpui-Sairang inkar kawngpui chhia siam mek chu duhthusam la ni lo mah se, mipuiin harsatna an tawh nasat tawh avangin tuialhthei phur lirthei (oil tanker)-te tlân an phalsak tawh tih an tarlang.

MOTDA leh PETUM hruaitute chuan an lo inruahman lâwk angin nimin khan National Highway-06 Kawnpui leh Sairang inkar kawngpui chhe lutuk thawm ṭhat hna thawk mek an enfiah a ni.

Tuialhthei phurtu pawl pahnihte chuan, "Kawnpui-Sairang inkar kawngpui siam ṭhat mek chu, kawng khuar zualpui laite hnawh ṭhat ni tawh mah se, oil tanker tlan nan duhthu a la sâm lo hle. Kawng siam mek hian duhthu sâm lo hle mah se, tuialhtheiah Mizoramin harsatna a tawh nasat tawh em avang leh mipui mamawh a rang thei ang bera phuhrûk a ngaih tawh si avangin oil tanker tlân thei leh tlân ngamte chu tlân tawh mai ni se kan ti," an ti.

MOTDA leh PETUM chuan, kawngpui chhia siam meka hmachhawp la awm mekte chu ṭha tak leh rang taka thawh chhunzawm zel a nih theih nan sorkarin hma a lak chhunzawm zel an beisei thu an tarlang bawk.