MCON-in Graduation & Lamp Lighting hmang

Mizoram College of Nursing (MCON) chuan nimin khan an multipurpose hall-ah 37th Graduation and Lamp Lighting Ceremony 2024 an hmang a, Health & Family Welfare minister Lalrinpuii leh adviser to CM (Finance) TBC Lalvenchhunga ten an hmanpui.

Health Minister chuan, B.Sc. Nursing graduate thar mi 30 leh top 10-a mi palite a lawmpui thu sawiin, "Kan state tan leh kan ram tana mi ṭangkai tak an la nih ngei ka beisei," a ti a; first year zirlai, Nightingale Pledge hmanga thu tiam tharte chu nurse ṭha an nih theih nan an zirlaite ṭha taka zir turin a chah.

Lalrinpuii chuan, social media a chak tawh tih sawiin, nurse vîn leh nurse sual chungchang social media-a hmuh tur a awm leh ṭhin chu a pawi a tih thu a sawi a, "In ṭawngkam khat lek pawhin damlote a tidam sawng sawng thei. Mi dangte ṭanpui thei tura zir chhuak in ni tih hre reng ang che u," a ti.

TBC Lalvenchhunga chuan, nurse zir chhuakte chu kohna an dawn ang ngeia damlote tidamtu, chhawmdawltu leh fuihtu ni zel turin a fuih a, "Naktuk aṭang chuan an zirtirtute tel loin mi dang entawn tur leh mi dangte zirtirtu in nih a ngai tawh dawn," a ti a; an thawhna a piangah Mizo tlawm-ngaihna lantir zel turin a chah.

MCON principal Lalduhsaki sawi danin, MCON hi General Nursing and Midwifery zirna turin kum 1980-ah din a ni a, kum 2005-ah B.Sc. Nursing zirnaah hlan kai a ni. Tunah hian nurse zirlai 131 an awm mek a; zirtirtu 22 leh thawktu dang (non teaching staff) 30 vel an awm bawk.

MCON aṭanga graduate thar mi 30-te hi batch 16-na an ni a, hmeichhia 28 leh mipa pahnih an ni. B.Sc. Nursing zir chhuak thar zingah hian Kolkata-a TATA Medical Center, Delhi-a Apollo Hospital leh Max Hospital leh, Hyderabad-a Yashoda Group of Hospital-a hna hmu sa mi 17 an awm a ni.