Rel kawng siam vanga kawng chhia Aizawl DC kaihhruaiin sawiho a ni

September 19, Ningani tlai khan Sairang Dinthar khawtlang hruaitute'n rél kawng siam vanga an huam chhunga kawng chhia chungchang Aizawl DC Lalhriatpuia hnena an thlen chungchang, Aizawl Bawrhsap kaihhruaiin a pisaah Northeast Frontier Railways hotute nen sawiho a ni.

Sairang Dinthar VC-te chuan, Aizawl DC hnenah hian FCI kudam sak mek kaltlanga vantlang kawng rei tak an lo hman tawh, Kangtek kawng chu NF Railways-te'n bungraw phurh nan an ṭâwm avang leh a bul hnai mimal ram an nêk avangin khawtlang mi tam tak eizawnna leh in leh loin a tawrh phah thu an thlen a; hma laksak turin an ngen.

NF Railways hotute chuan, October 20, 2024 thleng hun pe turin Aizawl DC an ngen a, chumi chhung chuan kawng siam hna leh a ṭul dangte theihtawp chhuaha thawh an intiam a ni.

Railways hotute chuan, rél kawng atana ram an lei tawh chhungah dawr siam mi pakhat a awm avangin an hna a ṭhuanawp phah niin an sawi a; Aizawl Bawrhsap chuan dawr siamtu chu a rang thei ang bera titawp turin a chah a, September 30, 2024 hnuah a la inthiar chhuah loh chuan a dawr chu ṭhiahsak a nih tur thu sawi.