Eirawngbawlna gas dinhmun sawiho

Food, Civil Supplies & Consumer Affairs (FCSCA) minister B Lalchhanzova hoin nimin khan a pisaah FCSCA department hotute leh LPG distributor-te'n tunlaia eirawngbawlna gas dinhmun an sawiho.

B Lalchhanzova chuan, Mizoram mamawh tinrêng lak luhna kawngah harsatna a thlen mek thu sawiin, eirawngbawlna gas harsatna lian lutuk awm lo tura theihtawp chhuahtu department hotu, Indian Oil Corporation hotute leh Mizoram LPG Distributor-te chungah a lawm thu a sawi a; theihtawp chhuaha ṭan la chhunzawm turin a chah.

Ṭhutkhawma tarlan danin, tun dinhmun-ah mipui tan eirawngbawlna gas pek chhuahah harsatna lian tham a la awm lo a ni.

Rawtna an siam angin, Mizoramin hnianghnar taka eirawngbawlna gas a hmuh zel theih nan FCSCA department chuan Indian Oil Corporation hotute hnenah lehkha an thawn nghal a ni.