Hmeichhe venhimna dan sawiho

State Hub for Empowerment of Women (SHFW), Women & Child Development (WCD) leh Mizoram State Legal Services Authority chuan nimin khan Taxation auditorium-ah 'Protection of Women from Domestic Violence Act, 2005' chungchang zirhona an buatsaih a, Gauhati High Court judge Justice Nelson Sailo-in a hmanpui.

Justice Nelson Sailo chuan, India Danpuiin hmeichhiate dikna leh chanvo ngai pawimawhin a humhalh tlat thu a sawi a, "Hmeichhiate chunga hleihlenna thleng ṭhin chungchang a ngai thutak hle. IPC thlaktu dan thar Bharatiya Nyaya Sanhita-ah pawh a ngaih pawimawhzia chiang takin a lang," a ti.

Zirhonaah hian Gauhati High Court Aizawl Bench registrar Dr HTC Lalrinchhana'n Protection of Women from Domestic Violence Act, 2005 chungchanga pawimawhte leh a kaihhnawih hrang hrangte mawhphurhna a zirtir.

Additional District & Session judge Sylvie Zomuanpuii Ralte-in in chhung khura hmeichhiate chunga hleilenna thleng vanga court-in thubuai a chinfel tawh chhinchhiah tlakte a sawi zau a, thubuai a thlena hmalak dan turte a sawifiah bawk.