Ni tin mamawh a rawn luh zel theih nan Sorkarin hma a la zel - FCSCA Minister

Food, Civil Supplies & Consumer Affairs (FCSCA) minister B Lalchhanzova chuan, ni tin mamawh (essential commodity)-te state pawn aṭanga a rawn luh zel theihna atan sorkarin hma a lak thu a sawi.

B Lalchhanzova hian September 19, Ningani khan Kawnpui dáia kawng bal vanga mipui ni tin mamawh phur lirthei tangkhanna hmun a tlawh a; ni tin mamawh phurte'n harsatna lian nei loa kawng an zawh theihna turin PWD leh kawng enkawltu BRTF-te ruahmanna a siampui a ni.

FCSCA Minister chuan, chatlak loa ni tin mamawh phurh luh a nih zel theih nan sorkarin hma a lak zel thu sawiin, chî-âi lo turin mipui a chah a, "Sorkarin a ṭul ang zelin ruahmanna a siam dawn," a ti.

Kawng balna hmun an tlawh zawhah Supply Minister ho hian Kawnpui Police Station-ah PWD executive engineer Lal-duhthlanga, FCSCA Joint Director leh Kolasib District Truck Owners' Association-te'n hmalak zel dan tur an sawiho a ni.