ZPM sorkarin mipui an báwl mai mai - MPCC General Secretary

Mizoram Pradesh Congress Committee (MPCC) chuan nimin khan Congress Bhavan-ah political session an hmang a; thu sawitu Joseph Lalhimpuia, MPCC general secretary chuan, ZPM sorkarin mipui an báwl mai mai niin a sawi.

Joseph Lalhimpuia chuan, ZPM-te'n thiam taka thil ṭha tinreng, an tih theih loh tur pawh intiamin an inzawrh avangin Mizo mipuiin beiseina sang tak nen an thlang tling niin a sawi a, "An sawi ang an lo ni lo tih a lang mek a, mipuite hi min lo báwl mai mai a ni. Thla riat emaw chauh sorkarna an la kalpui chungin ṭhalai, kut hnathawk leh ran vulhtu te, sorkar hnathawk thlengin an beidawng mek a ni," a ti.

ZPM sorkar hnu, January 1 - September 19, 2024 chhungin ASF vangin vawk 12,756 a thi tawh a, vawk 21,871 suat a nih tawh thu sawiin Joseph Lalhimpuia chuan, "A vaiin vawk 34,627 a thi tawh a, an la thih belh zel bawk. Vawk thi hi chawh rualin inchi 35 ni ta se, market rate-in Rs 1,038,810,000 lai a tling. ZPM sorkar, mi dangte aia ṭhaa insawi hian vawk vulhtute ṭanpui dan tur mutmawh hnàrmawhah an la nei miah lo," a ti a; ZPM sorkar chu vawk vulhtute ṭap thâwmin a la béng harh zo lo niin a sawi.

Joseph Lalhimpuia chuan, July 2, 2024-a Lungleia Council of Minister ṭhutkhawma ei leh in senso chu Rs 3,21,565 a nih thu te, LMC-a coun-cilllor-te hlawh 106%-a tihpun a nih thu leh sum tuak nan parking fee an tihsan thu te, petrol leh diesel man tihsan a nih thute a sawi bawk.