Civil Hospital, Lungleiin certifcate dawn lawm

Civil Hospital, Lunglei chuan India rama sorkar damdawi-in ṭha tehnaa certificate chi thum - National Quality Assurance Standards (NQAS), LaQshya leh MusQan an dawn chu nimin khan an lawm a, Lunglei High Power Committee vice chairman V Malsawmtluanga, MLA-in a hmanpui.

V Malsawmtluanga chuan Civil Hospital, Lungleiin India rama damdawi-in ṭha tehnaa certification pawimawh tak tak pathum a dawng thei chu thawktute thawh rimna rah a ni, "Lunglei district chauh ni lo, chhim lam district zawng zawng aṭanga damna duha mipuite tluk luhna a nih angin, an hlawhtlinna hi chhim lam pum pui tana hlawhtlinna niin ka hria," a ti.

Lunglei Civil Hospital hian June 15, 2024 khan Ministry of Health & Family Welfare aṭangin sorkar damdawi-in inrêlbàwlna, hmanrua leh thawktute theihna, thiamna leh hna thawh dan phunga tehfung hrang hrang 369 hmanga India rama damdawi-in ṭha bik tehna NQAS certification a hmu a; certification dang pahnih - MusQan (naupang lam enkawlna ṭha bik) leh LaQshya (nau neihna hmun ṭha bik) certificate an dawng tel bawk.