Lungleiah SHG-te'n an thil siam an zuar

Rama chawlhkar hnih awh tur faina beihpui thlakna, Swachhata Hi Seva 2024 kalpui mek pualin UDPA department chuan nimin khan Lunglei Convention Centre-ah an hnuaia self help group (SHG)-te thil siam zawrh chhuahna, 'Swachh Bharat Mission Cultural Fest' an buatsaih a, Lunglei additional DC James Miahlung-in a hawng.

SBM Cultural Fest-ah hian stall 18 a awm a, UDPA department hnuaia SHG 15 leh mimal pathumin an thil siam chhuah leh thlai tharte mipui hmuh leh lei turin an pho chhuak.

Thlai leh thei tharlám te, thlai leh thei aṭanga ei tur chi siam chhuah te, chhang, sahbawn, puan leh hnáng aṭanga siam in chhung bungrua leh hmanrua te, bawlhhlawh thehthang mai mai tur aṭanga thil mawi leh hlu, hman tlak siam chhuah (waste to art) leh thil dang chi hrang hrang pho chhuah a ni.

James Miahlung chuan, Swachh Bharat Mission hnuaiah faina atan ngawrh taka hmalak a nih thu a sawi a, "Hmalakna hi khua leh tui zawng zawng thawhhona tur a nih angin, mi tinin a hlawhtlin nan mawh kan phur. Faina hi hriselna nen inkungkaih tlat a nih avangin district fai leh hrisel ni turin a paihna hmun ni loa bawlhhlawh paih chìn loh tur a ni," a ti.

Lungleia district urban development officer C Sawihlira sawi danin, Swachhata Hi Seva hi Swachh Bharat Mission hmalakna peng khat atan kum 2018 aṭanga kalpui a ni a; faina leh thianghlimna lamah mipuiin rilru an pek a, an pên chhuah a, fai lehzualna tura hmalakna tak a ni.