Minister 2-in NH kawng siam an tlawh Ni tin mamawh phur lirtheite kaltir an ni

September 21, Inrinni khan PWD minister Vanlalhlana leh Food, Civil Supplies & Consumer Affairs (FCSCA) minister B Lalchhanzova chuan Kawnpui leh Khamrang inkara kawng chhia siam mek an tlawh. Kawng siamtute nen sawiho a nih hnuah tlai dar 5:30 aṭangin mipui ni tin mamawh (essential commodity) phur Aizawl lam pante kaltir ṭan a ni.

PWD Minister chuan, NH-06 kawng thawm ṭhat hna theihtawp chhuaha kalpui a nih thu sawiin, "September 18-a kan enfiah hnuah hmasawnna tam tak hmuh a ni. Kuminah ruahtui tla tamin Mizoram hmun hrang hrangah harsatna a thleng a, hriat theih chinah leiminin hmun 573 aia tam mahah kawng a hnawh ping," a ti a, kawng siam hna thawktute chu tha thlah loa hma la zel turin a chah.

Mizoram ei leh bar lak luhna kawng pawimawh tak Silchar pawhtu kawngpui dangah pawh fûr ruahtui tam avangin harsatna namenlo a awm tih sawiin Vanlalhlana chuan, "Kawngpui chhia vanga nunphung khaihlak sukiang tura sorkar hmalakna thlawpa ṭhahnemngai taka ṭawiawmtu YMA, NGO hrang hrangte leh khawtlang hruaitute hmalakna a fakawm," a ti.

FCSCA minister B Lalchhan-zova chuan, tank lorry-te'n Aizawl an pan mek thu sawiin, "Chung bakah chuan Silchar-a tuialhthei dawh mek pawh an awm," a ti a, tuialhthei leh ni tin mamawh dang phurte a rawn thlen belh zel tur thu a sawi.

Minister pahnih ho hian kawng thawm ṭhat hna thawh meka hmasawnna thlen chinte ngun taka ngaihtuah a nih hnuin tlai dar 5:30 aṭangin ni tin mamawh bungrua phur lirtheite chu kaltir a ni a; lirthei kal chungin kawngpui vil leh thawm ṭhat hna thawh zel tum a ni. September 21 tlai aṭangin Silchar lam pan turte chhuahtir a ni bawk.

Sorkar thuchhuah tarlan danin, September 18, 2024 khan PWD Minister leh Deputy Speaker-in kawng chhe lutuk thawm ṭhat hna thawh dan an lo en tawh. September 18 hian lirthei tangkhangte chhuahtir a ni a, ngawrh zawka kawng siam a nih theih nan lirtheite dintirin September 19-21 chhung kawng thawm ṭhat hna thawh a ni.

Kawng thawm ṭhatnaah hian PWD chu chu team pali-ah an inṭhen a, backhoe (JCB) panga, excavator pakhat leh roadroller pali hman a ni a, hlawhfa tam zawk rawih a ni bawk.

NH-06 Kawnpui-Khamrang huam chhung km. 122-123 inkarah kawng thawm ṭhat ngai zual hmun 2-3 velah a awm a, km. 124-126 inkarah hmun 5-6 leh km. 129-132 inkarah hmun 4-5 vel a awm bawk a; thawm ṭhat ngai zualte chu thawm zawh a ni tawh a, vil zui zel a ni dawn. Lirthei tana kal harsa zual hmun danga mite pawh a ṭul anga thawm ṭhat zel tum a ni.

Kawnpui-Khamrang inkar hi Sadguru Engineers & Allied Services Pvt. Ltd. siam a ni a, May 2025 thlenga enkawltu tur an nuih laiin, an enkawl zui ṭhat loh avangin sorkar (PWD)-in an tihtawpsak. Sadguru pawisa dahkham nuai 35.37 hmangin PWD-in thawm ṭhat hna an thawk mek a, sum hian a daih dawn loh avangin sorkarah sum an dil belh.

NH-06 hi Ministry of Road Transport and Highways (MoRTH) kawng niin, thlûr li (four lane)-a siam turin NHIDCL kuta dah a ni. DPR siama tender chhuah niin, contractor thlan a ni tawh a, zangnadawmna chungchangah forest ram leh mimal ram inthuah a awm avangin hna ṭan theih a la ni lo.

Sadguru Engineers & Allied Services kawng siam Kawnpui-Khamrang inkar hi defect liability period chhunga la awm a nih avangin Mizoram PWD aṭangin NHIDCL-in an la chhawng thei rih lo a, NHIDCL hnenah hlan thuai tum a ni a, hlan a nih hnuah chuan NHIDCL-in an enkawl tawh ang.

NH-06 kawngpuia Khamrang-Sairang inkar bik erawh chu NHIDCL kutah hlan a ni tawh a, NHIDCL hnuaia company-in an enkawl mek a ni.