Lungawi loh lantir nan NHM hnuaia thawkte'n badge dum bel an tum

NHM Employees Union Mizoram (NEUM) chuan Mizoram sorkarah phût chi hrang hrang an nei a, an thil phutah sorkarin hmalakna mumal a neih loh chuan lungawi loh lantir nan September 26-28, 2024 chhung badge dum bel an tum.

NEUM thuchhuah chuan, "Sorkar hmalakna kan ngaichâng dawn a, hmalakna mumal a awm loh chuan September 26-28, 2024 chhung hian badge dum bela lungawi lohna lantir kan tum a, hma kan sawn lo a nih chuan kan kal zel dan tur ngaihtuah a ni ang," an ti.

NEUM chuan, "Health & Family Welfare department-a regular post lak tur ṭhenkhat - health worker, staff nurse, laboratory technician, x-ray technician, etc. ruahmanna leh rawtna an siamah NHM staff-te tana hamṭhatna awm thei lo zawnga fresh veka parent department aṭanga proposal a kal hi ṭha kan ti lo a, pawi kan ti hle," an ti a; Mizoram sorkarin June 18, 2024-ah Mizoram Gazette Notification, 'Regularisation/regular appointment of Centrally Sponsored Scheme Employees' a tichhuak erawh lawmawm an tih thu an tarlang.

HFW department hnuaia regular post lak tur reng rengah The Government of Mizoram Regularisation of Centrally Sponsored Scheme Employees Scheme 2024 anga kalpui a nih theih nan hma lakpui turin department hotute an phût tih an tarlang bawk.

NEUM-IN AN TARLANTE
☑ Health worker lakna tura proposal kal laiah department-in a propose post 150 lakna tur aṭanga DPAR-in post 51-a a tihniam hi ṭha lo kan ti tak zet a, a tira proposal anga kalpui kan phût. Post dang lakna tur (staff nurse, x-ray technician, pharmacist, etc) fresh-a lak tura ruahmanna awm mekah NHM employee-te tana 70% tal dah turin kan phût tlat.
☑ Health Secretariat Letter No.A.12031/11/2024-HFW/7 Dated 29.7.2024 hmanga Health directorate-te CSS (NHM) Regularisation chungchanga information a dilna vawiin thlenga chhan a ni lo hi chhanna pe thuai turin kan phût.
☑ A chunga Gazette Notification ang hian HFW department-a vacant post awm zawng zawng 70% tal NHM hnuaia kum 10 thawk tawhte tan an corresponding post ṭheuhah regularise ni se kan ti.
☑ NHM hnuaia contractual-a kum 10 chuang thawk mek HFW department-a corresponding post nei lo zawng zawng tan special post (temporary post) siamsaka regularise kan phût.