KHAWTHLIR

Minister-in enfiah

Sports & Youth Services minister Lalnghinglova Hmar chuan September 21, Inrinni zing khan Mualpui, Aizawla infiamna hmunhmate tlawhin a enfiah. Lalnghinglova Hmar chuan, Mualpuia infiamna hmunhma hrang hrangte chu Mizoram huap pawha a ṭha pawl a nih avangin ṭangkai thei ang bera hman zel ni se a duh thu a sawi.

Truck-in chil hlum

Nimin chhun dar 1 vel khan Vanlalvena (37) s/o Lalrinsanga, Tuithiang, Aizawl chu Hunthar Venga lei tlakhniamnaah truck-in a chíl a, ká chhawn lohin a thi. Vanlalvena hian scooty a khalh a, truck nen an intai avangina tlu a, truck-in a chíl zui a ni.

Training khar

Hnahthial District Disaster Management Authority hnuaia September 17-21, 2024 chhunga Quick Response Team Training buatsaih chu September 21, Inrinni khan khâr a ni. Training-ah hian Hnahthial khawpuia YMA branch tin aṭangin mi pahnih leh YMA sub-division aṭangin mi pahnih an tel a; mipui pungkhawm thunun, chhiatna chi hrang hranga hmanraw chi hrang hrang hmanga chhanchhuah hna thawh dante inzirtir a ni.

Raltlan ṭanpui

YMA, Tuichawng Group chuan raltlante ṭanpuina tura Central YMA aṭanga an dawn Rs 5,00,000 hmanga buhfai an lei chu an huam chhunga cheng mek Bangladesh raltlânte hnenah tun hnai khan an hlan. Tuichawng Group YMA huam chhungah hian Bangladesh aṭanga rawn raltlan mi 1,387 an awma chhinchhiah a ni a, buhfai an sem hi mi pakhat tan kg. 4 zelin an pe a ni.

YCA-in Chawngteah kawng an zawh

Central Young Chakma Association (YCA) huaihawtin nimin khan Chawngteah Chakma mipuite'n kawng an zawh. Kawngzawh huaihawt chhan chu, Chittagong Hill Tracts, Bangladesh-a hnam tlêm zawk (minority)-te tihbuaina nasat vang leh thihna hial a thlen vang te, in 100 chuang leh Buddhist temple-te hâl duh loh lantirna a ni a; Chakma NGO-te chuan Prime Minister hnenah Chawngte SDO (Civil) kaltlangin memorundum an thehlut nghal a ni.