Bawlhhlawh paih lirthei tlântir turin Mayor-in local council-te a chah

Aizawl Municipal Corporation (AMC) hnuaia bawlhhlawhna lirthei neitute leh enkawltute chuan an thil phut tihhlawhtlin a nih loh avangin vawiin aṭangin tlân loh an tum. AMC Mayor erawh chuan bawlhhlawh paihna lirtheite tlântir turin local council-te a chah.

Mayor Lalrinenga Sailo chuan thuchhuah siamin, bawlhhlawh paih lirthei enkawltute'n AMC-a an thil phût avanga September 23, 2024 aṭanga bawlhhlawh khawn an tum lo chu AMC-in pawi a tih thu a tarlang a, "LC tinte mahni veng ṭheuhah bawlhhlawh khawn motor-te tlantir thei turin kan ngen che u a, eng emaw harsatna awm thei veng turin police duty turte ruahman a ni dawn," a ti a; LC-te chu thawhpuiah a sáwm.

Aizawl Mayor chuan, bawlhhlawh paih motor hman man chu a khát tawkin tihsan a ni ṭhin tih tarlangin, ennawn leh tum mek a nih thu a tarlang a, "Bawlhhlawh paih motor hi PPP mode-a kalpui a nih avangin mipui pawisa thawh tur pawh a nghawng tel dawn a, chuvangin, AMC sum dinhmun leh mipui lam thawh ve turte uluk taka chhût a ṭul a, hmanhmawh taka tih mai a harsa a ni," a ti.

Nawrh an tum chungchangah bawlhhlawh paih motor pawl hruaitute nen an inbiam thu sawiin Lalrinenga chuan, "AMC-in an motor a chhawrna term-te a tàwp tawh avangin term thar kal dan turah thutlukna siam tum mek a nih thute sawipui an ni a, rate tihfel nan term thar nghak tura kan ngennain awmzia a nei ta lo," a ti a; mipui tana harsatna thlen zawnga hma an la chu pawi a tih thu a tarlang.

Aizawl Mayor chuan, bawlhhlawh paih motor neitute leh Aizawl City LC Association hruaitute nen vawiin (September 23) hian bawlhhlawh paih motor hman man chungchang sawiho tum a nih thu a sawi a, "Harsatna siam loa sawifel theih ngei kan beisei," a ti.

Tarlan tawh angin, Aizawl Garbage Truck Owners’ Association, PPP Mode Bawlhhlawh Paih Welfare leh Sanitation Driver & Handyman Association hruaitute chuan September 20, 2024 khan Aizawl Press Club-a thuthar thehdarhtute an kâwmnaah, bawlhhlawh paih man siamṭhat an phût hlawhtlin loh avangin tlan loh an tum thu an puang.

Pawl pathumte'n an phût an tarlan chu - bawlhhlawh paih lirthei hman man rualkhai leh mumal zawk, veng hlat dan mil leh tehkhawng mumal neia siamṭhat a ni a; State Transport Authority rate anga rate siam an phût a ni.

AMC-ah LC 85 a awm a, bawlhhlawh paih nan lirthei 151 hman niin, LMV (pick-up leh a tlukpui) 69 leh MMV (LPK 407 leh a tlukpui) 82 a ni. Bawlhhlawh paih man chu AMC-in 60% a tum a, LC-te'n 40% an tum thung.