ZORO-in Myanmar-a Zo hnahthlakte inkarah remna kawng zawngin hma a la

Myanmar rama Zo hnahthlak - Chin National Front (CNF), Interim Chin National Consultative Council (ICNCC), Chin Brotherhood leh Chinland Council-te chuan Zo Re-Unification Organisation (ZORO) kaihhruaiin September 21, Inrinni khan inremna neih theih dan tur an sawiho.

Thuthlung sawihona hi ZORO president R Sangkawia'n a kaihruai a, vice president Rohmingthanga Kawlni-in hunserh a hmang.

ZORO general secretary L Ramdinliana Renthlei chuan ZORO-in remna palai hna an thawh chhan sawiin, “Zo fate hi unau vek kan ni a, inhmu thiam lo tur kan ni lo a, ṭang rual tur zawk kan ni. Unau kan nih angin inṭhen thei kan ni lo a, indo thei pawh kan ni lo. Zo fate chu khawi hmunah pawh awm ila lungrual taka awm tur kan ni a, keimahni leh keimahni hi hmelmaah kan insiam tur a ni lo a, hmelma thuhmun nei tlang zawk tur kan ni," a ti a; Zo fate chu Pathianin puihnain eng tikah emaw chuan an la insuihkhawm dawn thu a sawi.

ZORO adviser Lalmuanpuia Punte, MLA chuan, Zo fate inrem taka awm chu Mizoram sorkar duh dan a nih thu sawiin, "Vawiina kan inkawm khawmna pawh hi sorkarin min hriatpui a ni a, sorkarin ZORO kaltlangin remna palai hna kan thawk a ni. India sorkar pawh hian in inrem a duh a, India hian ṭanpuina min pek pawh a duh a ni,” a ti.

Inremna thuthlung sawihonaah hian MLA Dr Lorrain Lalpekliana Chinzah pawh a tel a ni.

Sawihonaah hian, "Keini Chin National Front (CNF), Interim Chin National Consultative Council (ICNCC), Chin Brotherhood leh Chinland Government-te September 21, 2024-a ZORO huaihawta inkawm khawmna neite hian uluk taka kan sawi ho hnuah a hnuaia tarlante hi thinlung takin kan pawmin kan zawm tlang tih kan puang e," tiin thuthlung an pawm a ni.

Inremna thuthlung zingah chuan, "Kan ram leh hnam tana hma kan lakna kawngah kan ṭhahnemngaih luat vanga unau kan inhmu thiam lo hi pawi kan ti a, tun hnuah thleng tawh lo se kan duh. Tun hnuah buaina leh harsatna a lo awm pawhin tharum leh ralthuam che lek zawng a hmalak loh ni se," an ti a; Inremna Committee siam an rel bawk.