Hun ṭha hman thiam a pawimawh - Sports Minister

YMA, Ṭhuampui Branch chuan September 21, Inrinni khan Ṭhuampui Venglai Presbyterian Kohhran Hall-ah an veng chhung zirlai leh infiammi ti ṭhate lawmpuina leh chawimawina hun an buatsaih a; khuallian Sports & Youth Services (SYS) minister Lalnghinglova Hmar chuan, hun ṭha kan neihte hman thiam a pawimawh thu a sawi.

Lalnghinglova Hmar chuan, zirlai leh infiammite nunah a bik takin hun vawn thiam a pawimawh thu a sawi a, "Hun ṭha kan hman thiam a pawimawh a, kan hun ṭha neih hi ho mai maia hmang ral lo a, bawhpelh lo turin ka chah duh che u a ni," a ti.

Zirlaite chu hma lam hun atan tun aṭanga an inbuatsaih ṭan tura chahin SYS Minister chuan, "Tih tak takna nen kan thil tum tihlawtling ngei turin rilru buatsaih a pawimawh," a ti a; hlawhtling tur chuan tum mumal tak neih a ṭul thu a sawi.

Sports Minister chuan, khawvelah inelna a san tawh thu sawiin, "Ṭhalaite hi a ngai renga awm a hun tawh lo a, hmasawn duhna rilru neih a ngai. Chumi atan chuan thil in tih dan in thlak a ṭul," a ti a, kawng bibohin harsa mah se, beidawng loa hma lam pan zel turin a fuih.

YMA, Ṭhuampui Branch hian zirlai ti ṭha mi 111 (HSLC 44, HSSLC 44, graduate 13 leh post graduate pasarih) leh infiamna lama mi chhuanawm mi pathum hnenah lawmpuina leh chawimawina an hlan.