Inkhawmpui thlen tur dan tur ngaihtuah

September 27 & 28, 2024 chhungin Mizoramin '21st Annual Conference of Commonwealth Parliamentary Association, India Region, Zone-III' a thleng dawn a; he inkhawmpui thlen dan tur leh inbuatsaih dan tur ngaihtuahin September 21, Inrinni khan Legislative Assembly secretary Vanlalthantlingi hoin a kaihhnawih tur sorkar department hotute leh Assembly Secretariat hotute an ṭhukhawm.

21st Annual Conference of Commonwealth Parliamentary Association, India Region, Zone-III hmang tura palaite chu September 26-ah Aizawl an rawn thleng dawn a, September 26 tlaiah Executive Committee Meeting nei nghal a ni dawn. September 27 chawhmaah Lok Sabha speaker Om Birla chuan MLA Library-a Archive Cell thar a hawng dawn a, chumi hnuah CPA Annual Conference hman ṭan a ni ang.

Mizoram Assembly speaker Lalbiakzama'n palaite lawmna thu a sawi zawhah Nagaland Speaker leh CPA Zone-III Chairman Sharingain Longkumer-in keynote address a sawi ang a; chief minister Lalduhoma, Rajya Sabha deputy chairman Harivansh Nayaran Singh leh Lok Sabha speaker Om Birla ten thu an sawi zui ang.

A ni khatnaa plenary session-a an ngaihtuah tur thupui chu 'Inclusion of the Northeast Region in the Indian-ASEAN Vision for Trade and Cooperation' tih a ni a; conference ni hnihnaa thupui sawiho tur chu 'Merging the ministry of DoNER with NEC for better strategic planning and coordination of various projects in the region' tih a ni.