Champhaiah bûkna dik lo an man

September 21, Inrinni zing khan Champhai khawpuia chawhmeh bazarna hmunpui ber - Champhai Bazarpuiah bûkna dik lo, non standard spring balance pakua leh beam scale (kg. 2) pakhat man a ni.

Champhai Bazarpuia bûkna leh tehna hmante chu Champhai district civil supply officer CC Sakhawliana hoin Legal Metrology department, YMA Sub-Hqrs. Champhai leh MHIP bakah, Champhai Consumer Union hruaitute'n an endik a ni.

Champhai DCSO chuan, bazar leh dawra bukna leh tehna hmante chu a dik leh dik loh a khát tawka enfiah a nih dawn thu sawiin, "Consumer-te'n an chanvo dik tak an chan ngei theih nan hma lak zel kan tum," a ti. Consumer-te chu an chanvo dik tak an chan ngei theih nan lungawi lohna an neih chuan District Consumers Dispute Redressal Commision hmang ṭangkai turin a chah bawk.