Ram tan theihtawp kan chhuah zel dawn - K Sapdanga

Minister K Sapdanga chuan September 21, Inrinni khan Nausel a tlawh a, vantlang inkhawmah thusawiin, Pathian chakna ring chung leh mipui thawhhona nen ram tan theihtawp an chhuah zel dawn thu a sawi.

K Sapdanga chuan, inthlan campaign laia an auhla zinga mi - rinawmna leh taimakna tih chu an thupui a la ni reng tih sawiin, "Ram kan vei ta sa sa, a tawp thlenga kan ram tana thawk turin kan rilru pawh kan siam thar zel a ngai. Mipuiin beiseina sang tak neiin kan kutah rorelna an dah a, Pathian chakna ring chung leh mipuite thawhhona nen kan ram tan theihtawp kan chhuah zel dawn a ni," a ti.

Minister Lalthansanga, bialtu MLA pawhin thu sawiin, Aizawl East-I chu bial taima an nih thu sawiin, "Chawhmeh leh thlai tharlám tak hmanga Aizawl khawpui châwmtu kan ni. Hei hi sorkar pawhin hriain, ei leh bara kan intodelh theih nan leh kan thlai tharte mumal zawka kan tihral theih nan Agriculture Produce Wholesale Market kan siam dawn," a ti a; huan leh lo panna kawngte lirthei kal theihna turin siam tum mek a nih thu a sawi.

Minister K Sapdanga leh Lalthansanga te hi minister of state Lalnghinglova Hmar-in a ṭawiawm a ni.