Sorkar laipuia mithiamte'n NEDP ṭha an ti: CM Hawla

Chief minister Lal Thanhawla chuan, Mizoram sorkar policy thar New Economic Development Policy (NEDP) chu sorkar laipuia mithiamte pawhin ṭha an ti niin a sawi.

Lal Thanhawla hian nimin khan Congress Bhavan-a inkhawmah thu sawiin, "NEDP thil tum leh nihphung inziahna Delhi-ah ka keng a, mi hrang hrang hnenah ka pe a, ṭha ti lo an awm lo. Hetiang programme ṭha state-in a duan chhuah an hriat ngai loh thu an sawi hlawm," a ti.

NEDP hlawhtlin nan a semtu leh dawngtute an pawimawh tih sawiin CM Hawla chuan, "Mimal tan ringawt ni lo, ram pumin a mamawhte kan zawng dawn a ni," a ti a; NEDP chu a ṭhat em avangin er tham a nih thu a sawi.

Chief Minister sawi danin, NLUP kalpui hun chhung atana tih kum nga a zawh tawh avangin NEDP hmangin NLUP dawng zinga hlawhtlinna la chang lo chhawmdawl ngaite chhawmdawl an ni dawn a, NLUP hnuaia ṭanpui hman lohte ṭanpui an ni bawk ang.

Ramin boruak a tawn ang zelin programme an neih ṭhin thu sawiin Lal Thanhawla chuan, "Rambuai laiin remna leh muanna. Chumi hnuah rambuai vanga harsate chhawmdawlna atan NLUP leh rangva in chung nei lote rangva sem," a ti.

Lal Thanhawla chuan, kum 10 chhung eptua an awm hnua sorkarna an chan leh hnuah, sorkar hnathawk hlawh a pun tawh bakah, thil man a to tawh avangin a kaihhruai sorkar chuan NLUP tam zawk an sem leh thu a sawi.

Zu chungchang sawiin Chief Minister chuan, "Kan tih tur kan ti tawh a, kan tih loh tur a nih chuan kan ti lo mai ang kan ti lawm lawm chung pawhin zu dawr suasama rawk a ni. Mak deuh chu zu man a tlawm a, a to chu a bo vek. Zu huat dan mak tak a ni," a ti.