Ramri hungnaa zangnadawmna leh Hamṭhatna siam nan vbc. 24 pek remti
Sorkar laipui chuan, India leh Bangladesh inkara ramri hungna siam vanga chhungkaw eng emaw zat in leh ram laksakte hnenah zangnadawmna cheng vbc. 24 pek a remti.
Thu dawn danin, zangnadawmna pek tura thutlukna hi July 28, 2016-a New Delhi-a Border Management Meeting-ah siam a ni. Meeting hi Ministry of Home Affairs-a Border Management Secretary-in a kaihruai a; Mizoram sorkar aiawhin Home departmnent-a additional secretary Lalbiakzama a tel.
Zangnadawmna pek tura tih ramri hungna siam-na hi Lawngtlai district-a Bangladesh ramríah a ni a; zangnadawmna pek bakah hian, ramri hungna siamin an in leh ram a tihchhiatsakte hmasawnna leh hamṭhatna siamsak pawh a tel. Hamṭhatna siam tur zingah chuan sikul leh damdawi-in dinsakte a tel a ni.
Sorkar laipui chuan Mamit district-a India leh Bangladesh inrîna hmuna ramri hungna siamnaa chenna hmun leh ram laksakte zangnadawmna pek nan leh hmasawnna hna thawh nan cheng vbc. 14.21 a lo pe tawh a; Lunglei district-a ramri hungna siamin a
tihbuai chhungkuate zangnadawmna atan leh hamṭhatna siam nan cheng vbc. 44 hmanna tur detailed project report sorkar laipuiah thehluh a ni tawh bawk.
Mizorama India leh Bangladesh inrinaa a hungna siam hna hi ramri aṭanga India ram lam meter 150-ah siam a ni a, ramri hungna tur chin chu km. 318-a thui a ni.