Leiminin in a hnâwlah mi 2 an thi

July 27, 2016 tlai dar 6 vel khan ruahsûr nasa vangin Champhai district-a Ngur khuaah leiminin Suanlala in a hnawl a, ina awmte hnâwl telin, mi pahnih an thi.

Leimin lai hian pa ber Suanlala feh a la haw lo a, a nupui Dawnsianmuangi (43) leh an fate panga bakah, an inlêngte pahnih an awm. In a chim tih hriat a nih veleh khawtlangin chhanchhuah hna an thawk nghal. Naupang palite dama lak chhuah an ni a, Dawnsianmuangi chu lak chhuah a nih hnuah a thi a; a hnu deuhah an fa naupang ber dawttu, Nemsiansangi (4) chu thia hmuh a ni.

Chhanchhuah hna thawktu zinga mi Laltlanthanga s/o Lian-kamlova chu leimin lehin a delh avangin a in tipalh a, a spinal cord a sawha a hriat a ni a; Champhai District Hospital panpui nghal a nih hnuah, Ningani zan vek khan Aizawla enkawl turin thawn a ni.