Sorkar sikulah English hmang dawn

Sorkar sikul leh zirlai harsa zawkte tihhmasawn nan, pawl 6 chin chung lamah zirlaite lehkha zirtir nan English hman a ni dawn.

Zirtirnaa English hman tura tih a nih thu hi School Education depart-ment chuan July 27 khan hriattirna a chhuah.

Parliamentary secretary (School Education) Joseph Lalhimpuia chuan Ningania Hnahthial College-in Freshers' Social & Graduation Day 2016 an hmannaah Mizoramin zirna pangngai kum 124 dáwn a neih tawh thu a sawi a, "Heti chung hian tih tur leh thawh tur kan la ngah hle. Tun hnaiah Education Reforms Commission rawtna zûlzuiin pawl 6 chin chung lamah medium of instruction atan English hman tur tih order chhuah a ni," a ti.

Technology chhuak thar zel mila zirlaite'n thiamna an neih theih nan zirtirna atan English hman tura tih a nih thu sawiin, Joseph Lalhimpuia chuan, "Khawvel zau zawk thlirin English mamawhna a sang zel a, Group of Expert-te pawhin bawhzui tura an dah a lo ni bawk nen, sorkar sikul leh mi retheite hmasawnna atan zirtirna pekna atan English hman hi ngaih pawimawh a ni," a ti.

English hman a nih avangin Mizo ṭawng hlam-chhiah a ni dawn lo a, grammar-te leh ṭawng dik zawk ṭhangtharten an thiam theih nan Mizo subject chu ṭha lehzuala kalpui a ni dawn tih a sawi.

Joseph Lalhimpuia chuan, kuminah district headquarters tinah model school din a nih thu sawiin, "Hengte hi private school ai pawha ṭhaa enkawl leh dâwm chhoh sorkarin a tum. School permission pek dante pawh hun rei tak kan neih loh hnuah tunah chuan siam a ni," a ti.

Hnahthial College-ah hian teaching leh non-teaching staff 37 an awm a, zirlai 126 an awm mek a ni.