KHAWTHLIR

Health camp

KVK, Lawngtlai chuan nimin khan Chawnhù-ah Free Animal Health Camp & Vaccination hun an hmang a, senior scientist Dr Michelle C Lallawmkimi leh scientist Dr Lalthazuali ten ui 20 leh ran dang 121 a thlawnin an enfiah.

Hnathawh thlirlet

Lunglei District Consultative Committee (DCC), District Level Review Committee, District Level Security Committee-te chu nimin khan DC Abhijit Vijay Chaudhari hoin Circuit House-ah an ṭhukhawm a, bank hrang hrangte hnathawh an thlirlet.

Roll tar chhuak

Aizawla veng pathum - Chite, Chhinga Veng leh Mission Veng local council inthlan tur atana Local Council Final Electoral Rolls, 2016 chu mipuite en theih turin nimin khan târ chhuah a ni a; bialtu MERO/AMERO leh locality level officer (LLO)-te hnenah en theih a ni.

Operation Muskaan

Nimin khan Serchhip SP conference hall-ah naupang bo leh baihvaite zawn chhuah beihpui, 'Operation Muskaan-II' kalpui mekah district chhunga hma latu leh a thawktu turte tana training buatsaih a ni. Operation Muskaan hi Ministry of Home Affairs bultuma neih a ni a, July 2016 chhungin beihpui thlak tur a ni.

Deptt. lak belh

Mara Autonomous District Council chuan, July 28, 2016 khan Cooperation department a lak belh a, Assistant Registrar of Cooperative Society JF Beihnai leh thawktu dangte chu MADC pisaah suan luh an ni. Cooperation nen hian MADC sorkar hian department enkawl 30 a nei ta a ni.

Kum 10 tlin lawm

Aizawl Hospital & Research Centre chuan, nimin tlai khan Synod Conference Centre-ah an damdawi-in kum 10 tlin an lawm a, Health minister Lal Thanzara'n a hmanpui. Kum 10 tlin pualin Aizawl Hospital hian hmun ṭhenkhatah
ṭanpuina an pe a ni.