Kawlphethaa intodelh turin sorkarin nasa takin a buaipui mek - Power Minister

Nimin khan Aijal Club-ah kawlphetha renchem leh awmze nei zawka hman ṭangkai a nih theihna tura hmalakna ‘Demand Side Management Project Launching Programme' buatsaih a ni a; khuallian Power & Electricity minister F Rodingliana chuan, kawlphethaa intodelh turin sorkarin nasa takin a buaipui mek thu a sawi.

Power & Electricity Minister chuan, Mizoram sorkarin kawlphethaa intodelh turin nasa takin a buaipui mek tih sawiin, "Central sorkar lamah bawhzui ngaite bawhzui zel a ni a, rei lo têah project ṭha tak tak bul ṭan a nih thuai theih ka beisei," a ti.

Mizoramin kawlphetha a mamawh zat chu kum 10 chhungin a lêt deuh thawa a pun thu sawiin F Rodingliana chuan, "Kum 2015-a kan mamawh san lai ber megawatt 97 vel a nih laiin, tunah chuan megawatt 163 chuang a lo ni tawh," a ti a; Mizorama kawlphetha siam chhuahte a pun si loh avangin ram pawn aṭangin man to tak taka lei a ngaih thu a sawi.

PE Minister chuan, renchem taka kawlphetha hman a ṭul thu sawiin, "Unit khat kan humhim chuan power unit khat thar chhuak tluk kan ni," a ti.

F Rodingliana chuan, Aggregate Technical and Commercial (ATC) loss avanga kawlphetha hloh tam lutuk tihtlem a ṭul thu sawiin, "Thawktute ṭan lak a ngai. Ṭhahnemngai taka mahni hna ṭheuh thawk tur leh kan hnate chu eizawnna ang maia ngai lo a, rawngbawlna leh ram leh khawtlang tana thawk kan ni tih inhriat reng a ṭul," a ti a, thâ thlah loa thawk ṭhin turin department-a thawkte a chah.

Demand Side Management Project hi sorkar laipuia Ministry of Power hnuaia Bureau of Energy Efficiency kaltlanga Mizoram DISCOM - Power & Electricity department leh Green Tree Global-te hmalakna tur a ni a, kum hnih chhunga kawlphetha mamawh 10% tala tihhniam tumna a ni.