MSCW Chairperson bànna pawm

Mizoram State Commission for Women (MSCW) chairperson C Lalchhandami, Ramhlun North-in bànna a thehluh chu Social Welfare, Tribal Affairs, Women and Child Development department chuan a pawm a, a ai awh lailawk tur a ruat nghal.

Social Welfare, Tribal Affairs, Women and Child Development department thuchhuah tarlan danin, MSCW chairperson aṭanga C Lalchhandami bànna thehluh pawm a nih hnuah, Governor remtihnain a aiawh turin MSCW member ni lai K Lalremruati chu chairperson lailawk atan ruat a ni. K Lalremruati hi chairperson nghet ruat a nih hma chu chairperson a ni ang.

Tarlan tawh angin, MNF party chuan C Lalchhandami chu dan kalhin, kum 65 a pelh hnuah MSCW chairperson atan ruat a nih thu an sawi a, báng turin an phût a ni.

C Lalchhandami hian September 7, 2024 khan bànna a thehlut a, bànna a thehluhah chuan a kum dik tak ang chuan MSCW chairperson la ni thei a nih thu a tarlang thung.