Kawng chhiat chhan - inthlahdah vang - MNF

MNF party hotute chuan nimin khan Aizawl Press Club-ah thuthar thehdarhtute an kâwm a; Mizoram hmun hrang hranga kawng chhiate chu sorkar inthlahdah vang nia an ngaih thu an tarlang.

MNF general secretary K Lalsawmvela chuan, chief minister Lalduhoma'n opposition hotu a nih laiin 'Kawng ṭha lo lutuk hi ZPM a sorkar ruala tihbo kan tum' tia a sawi thu a sawi a, "A sorkarin thla 9 hmel a hmu ta a, kawng ṭha lo chu a tibo ta em tih chu mipui chhàn tur ni se. Kumina kan kawng chhiat nasat em em chhan hi ṭhál chhunga repair/maintenance tih loh vang a ni. A hun taka repair chu ni se tun ang hun hi chu pumpelh theih ngei tur a ni a, sorkar thar honeymoon hmang rei, inthlahdah vang ni ngeiin a lang," a ti.

Kum dangah chuan November-April chhungin sum awm ang angin PWD-in khawpui leh kawng dangte an thawm ṭhat ṭhin thu sawiin Lalsawmvela chuan, "Kumin hian sum neih loh vang nge, repair hmuh tur a tlem hle. Kawng hi ṭha reng tura ngaih tur a ni lo a, fûr a zawh meuh chuan a chhe lai siam tur eng emaw zat a awm ṭhin," a ti a; kumin fûr chhungin Silchar-Sairang kawng leh Aizawl khawpui chhung kawngte a chhe nasa bik niin a sawi.

K Lalsawmvela chuan, sorkar kal taahte pawh kawng a chhe fo ṭhin tih sawiin, "Hetianga Silchar-Sairang leh Aizawl khawpui kawng chhiat nasat em em hi tun hmain a awm ngai lo hiala hriat a ni a, kawng chhiat lutuk avangin sorkar zawkin kawng a khâr hial hi thil thleng ngai lo niin a lang," a ti.

Sorkar liam tain SEDP atana cheng vbc 150 a dah, hman loha a hnutchhiah aṭanga thlai leina atana dah cheng vbc 110 chu hman a ni leh si lo tih sawiin Lalsawmvela chuan, "Cheng vbc 110 leh nikum SASCI first intalment atana central-in vbc 260 emaw lai a pek, a nihna tura hman si loha dahṭhat, kumin June-a pek chhuah chauhte kha kawngpui repair nan hman chu ni se, harsatna lian tak leh Aizawla kawng khuar tam lutuk hi pumpelh theih a ni ngei ang," tiin a sawi.

K Lalsawmvela chuan, kum 2018-a MNF sorkar hlimah Aizawl-Silchar kawng leh kawng dang tam tak nasa taka a chhiat thu sawiin, kawng chhiate chu chief minister Zoramthanga hmalaknain siam nghal a nih thu a sawi a; MNF sorkar laiin Covid-in a nuai chung pawhin tun anga kawng chhe lutuk a awm lo niin a sawi bawk.

MNF TARLAN ṬHENKHAT

* Kan CM hian opposition a nih lai khan, 'Kan sorkar hunah chuan contract hna reng reng EPC mode veka tih a ni ang' tih a sawi ṭhin a, EPC mode hi NH atan chuan state PWD hian 2018 aṭang khan a hmang tawh.

* ZPM sorkar hnua department palia tender-te chu EPC mode hman lohna vek a ni.

* Kawnpui-Khamrang (km. 118-133) hi a kawng neitu leh sum petu Ministry of Road Transport & Highways duh dana EPC mode contract niin, tender document leh contract agreement pawh EPC kalphung ang takin kalpui a ni a, PWD hian dan an bawhchhiatna a awm lo.

* State PWD hian an duh danin contract document an tidanglam ngai lo a, MoRTH standard document an hmang ṭhin.

* Kawnpui-Khamrang bik defect liability period chhunga maintenance atana pawisa dah nuai 11.78 pawh EPC guideline ang chiah a ni.

* Sadguru Engineers & Allied Services hi tihluihnaa bàn (terminate) ni loin, MoRTH hotute hriatpuinaa contract agreement zûlzuiin, contractor-in thubuai (dispute) a thehluh hnûkdâwkin, security cheng nuai 35.37 PWD-ah pein, maintenance mawhphurhna hlihsak (foreclose) a ni zawk.

* Sum pûk leh mipui chhiah/sum khawn an huaisen ang hian Mizoram chhiat leh ṭhatah mawh la ngam ngei tawh turin Chief Minister leh a ṭhuihruaite kan chah.

* Tun sorkar hi ṭhál laia muthluin, fûrah kawng nasa taka a chhiat hnuah 'Fûr ruahtui tam laiin kawng a repair theih loh' an ti.