Social media hman thiam a pawimawh - Sports Minister

Nimin khan Vanapa Hall-ah National Service Scheme (NSS) din champha vawi 55-na lawm a ni a, khuallian Sports & Youth Services (SYS) minister Lalnghinglova Hmar chuan, social media hman thiam a pawimawh thu a sawi.

SYS Minister chuan, NSS thupui 'Keimah ni loin nangmah' tih chu a Pathian thu hle tih sawiin, "NSS volunteer-te thisen pe tam ber in ni hi a ropui. Kan hnathawhna adopted village-ah danglamna a thleng em tih chu chonaah ngaiin keimahni inen let a, ṭan kan lak a pawimawh," a ti.

Danglamna thlentu kan ni em tih kan inngaihtuah a ṭul thu sawiin Lalnghinglova Hmar chuan, "Danglamna thlentu kan lo ni lo a nih chuan statistics tipungtu satliah mai kan ni thei," a ti a; an thil chìn ṭha lote an thlak danglam ngam em tih inzawt ṭheuh turin NSS volunteer-te a chah.

Tunlai mila inthlak danglam a pawimawh thu sawiin Minister chuan, "Tunlai khawvel chu mi thiam bikte khawvel a nih angin kan thil tih apiangah mi bik nih tum a pawimawh. Tum nei râna zirlaite zir chhuak a, nakin huna kan inchhîr loh nan social media a tâwk chauha hman dan thiam a ṭul," a ti.

State NSS officer F Sangvuana tarlan danin, Mizoramah NSS volunteer 30,100 an awm mek a, college 29 leh higher secondary school 72-ah NSS unit 301 din a ni tawh. NSS hmingin sorkar sum kum 2023-24 chhungin thisen unit 4,900 pek a ni a, pawl pakhat hminga thisen pek tam ber an ni mek.

Kum kal mekah NSS volunteer-te'n an hnathawh - public water point, vantlang inthiarna, luikawr leh vantlang shed-te siam leh tihfai hnatlang vawi 50 vel an nei tawh a ni.