Food Fest & Indigenous Toy Fair buatsaih

Women & Child Development chuan Rashtriya Poshan Maah (National Nutrition Month) hman mek pualin nimin khan Synod Conference Centre-ah Food Fest & Indigenous Toy Fair an buatsaih a, Social Welfare & Tribal Affairs, Women & Child Development minister Lalrinpuii'n hmanpui.

Food Fest & Indigenous Toy Fair-ah hian anganwadi centre-a naupang inzirtirna hmanrua (teaching learning material) insiamsiak te, Mizo chaw leh thei chi hrang hrang entirnate buatsaih a ni a; stall 12-ah anganwadi centre-a naupang zirtirna hmanruate anganwadi worker-te’n an pholang bawk.

Lalrinpuii chuan, naupangte inkhualtelemna hmanruaah Mizo siam leh Mizo rilru mil uar a pawimawh thu a sawi a, "Keini hnam tlemtête hi chuan hnam anga kan dam khawchhuah zelna turin Mizo taka kan naupangte kan enkawl seilen zel a pawimawh," a ti.

Naupangte chu ram hruaitu la ni turte an nih thu sawiin Minister chuan, "Chhuan lo awm zel tura kan innghahnate an ni. An hriselna leh dam khawchhuahna te, boruak him taka an seilen hi an chanvo a ni a, chu chu an neih theih nan mi tin kan pawimawh. Naupang zirtirna leh chawṭha hi kal kawp tlat a ni a, eng anga enkawl thiam ni mah ila, ei leh in hrisel an hmuh leh si loh chuan an hmasawnna a khingbai ang a, an nih tur ang an ni dawn lo," a ti a; anganwadi centre-a naupang enkawl dan ṭhate chu khawtlangin entawn se a duh thu a sawi.

Lalrinpuii chuan, naupangte'n an bula awmte ṭawngkam, mitmei, thil tih leh an chhehvela bungraw awmte aṭangin thil an zir nasat thu a sawi a; MzSRLM hnuaia nuho self help group-te'n naupang inkhualtelemna hmanrua chi hrang hrang an siamte anganwadi-a hman tura lei a ni tur chu lawmawm a tih thu a sawi bawk.

Food Fest & Indigenous Toy Fair hawnnaah hian WCD director Zoram-thangi Chhangte pawhin thu a sawi a ni.