AB-PMJAY-ah nuai 12,345 hmang tawh

Nimin khan Dawrpui Multipurpose Hall-ah Ayushman Bharat Pradhan Mantri Jan Arogya Yojana (AB-PMJAY) State Review Meeting neih a ni a, Health & Family Welfare minister Lalrinpuii'n a telpui. Mizorama AB-PMJAY hman a nih aṭangin damlo inenkawlna atan sorkarin cheng nuai 12,345 a hman tawh thu tarlan a ni.

Ṭhutkhawma tarlan danin, AB-PMJAY hi September 2018 aṭangin Mizoramah kalpui a ni. Scheme hnuaiah Ayushman Card/Golden Card 5,65,428 siam a ni tawh a, scheme-a inziak lutte'n a thlâwna damdawi-ina an inenkawl nan ṭum 1,12,000 an hmang tawh. Inenkawlna senso atan hian sorkarin Rs 1,23,45,86,300 a hmang tawh a ni.

Mizorama AB-PMJAY kalpuinaa damdawi-in ti ṭha ber chu Civil Hospital, Lunglei a ni a, lawmman atan Rs 1,00,000 leh thuchei an dawng. Community health centre/sub-district hospital category-a ti ṭha ber chu Vairengte CHC niin, Rs 70,000 an dawng a, primary health centre category-ah Kawrtethawveng PHC ti ṭha berin, Rs 50,000 an dawng. District tina Arogya Mitra thawk ṭha thlante hnenah chawimawina hlan a ni bawk.

Review meeting-ah hian sorkar damdawi-ina AB-PMJAY khawihtu medical officer te, Arogya Mitra leh block accounts manager-te an tel a; district tina chief medical officer leh medical superintendent-te'n an district-a damdawi-ina AB-PMJAY kalpui dan an tarlang.

AB-PMJAY hi chhungkaw khawsak harsa (Socio Economic Caste Census 2011 leh RSBY 2018) bakah, ration card eng (yellow) leh pawl (blue) nei chhungkuate tana duan a ni. Scheme hmang thei chhungkaw member tinin Ayushman Card/Golden Card an neih a ngai.