Minister-te'n sorkar ram ṭhehna an tlawh

Minister Dr Vanlalthlana leh Land Revenue & Settlement (LRS) minister B Lalchhanzova chuan nimin khan Aizawl North-II huam chhung, Ramhlun Sports Complex venga sorkarin ram a ṭhehna hmun tlawhin an enfiah.

Sorkar thuchhuah tarlan danin, Ramhlun Sports Complex-ah hian kum 2013 khan nasa taka leimin vangin in leh lo chân an awm nual a, 2013-ah vek hian Laipuitlang leh Ramhlun Venglaiah leimin vanga in leh lo chán an awm bawk. In leh lo chánte tan sorkar chuan Ramhlun Sports Complex veng chuàn hnuaia ram a ruahman a, in hmun tur ṭhehin teh zawh tawh a ni.

Leimin vanga in leh lo chán, sorkarin ram a ṭheha inbengbel tam berte chuan an LSC hmasa chu sorkar hnenah an lo hlan tawh a; an in hmun tur teh ni tawh mah se, house site pass emaw, LSC an beisei anga an neih mai theih loh avangin bialtu MLA Dr Vanlalthlana leh LRS Minister chu hmalakpui turin an ngen a ni.

Minister pahnihte chuan sorkar ram ṭheha chengte'n LSC an neih vat theih nan a ṭul anga ramrite enfel a, ram neitu tur dik takin ram an neih theih nan leh, a rang thei ang bera LSC pek chhuah a nih theih nan sorkarin hma a lak dawn thu an sawi.