Kut hnathawktute tan káwl a êng dawn - Agriculture Minister

Agriculture & Farmer Welfare minister PC Vanlalruata leh adviser to CM Lalmuanpuia Punte te chuan nimin khan Biate khaw lo zawh runpui an hmanpui. Minister chuan, sorkar tharin kut hnathawktute a ngai pawimawh a, thlai thar hralhna tur ngawrh taka a buaipui mek thu leh kut hnathawkte tan káwl a ên dawn thu a sawi.

PC Vanlalruata chuan, “Sorkar tharin kut hnathawktute a ngai pawimawh hle a, thlai thar hralhna tur pawh ngawrh takin a buaipui mek a ni. Tunah hian sawthing, hmarcha, aieng leh hmunphiah rate bituk mek a ni a, heng thlai rate a siam aia tlawma kut hnathawktute'n an hralh dawn a nih chuan an lamah sorkar a ṭang dawn a, support price a pe dawn. Sorkar rate ai to zawka hralhna tur an hria a nih chuan sorkar a inrawlh kher a ngai dawn lo," a ti.

Loneitute'n an deh chhuahte man man zawka an hralh theihna tur sorkarin a ngaihtuah thu sawiin Minister chuan, "An thawhrim rah senga an dinchhuah theihna tur hi sorkar chuan a ngaituahpui ber a, kalphung thar mipui sorkar hnuaiah chuan kut hnathawktute tan káwl a êng tawh dawn a ni,” a ti a; ZPM kaihhruai sorkar hnuaiah state GDP pawh kut hnathawktute avangin a kân chhoh an beisei thu a sawi.

Lalmuanpuia Punte, MLA chuan, a huhoa lo zawh rûnpui intihhmuh a ni chu ṭha a tih thu sawiin, "Mizo culture chhawm nunna a nih vangin kum dangah pawh a aia uara hman ṭhin ni se ka duh," a ti. Awm âwl leh tih tur neih loh lutuk vangin ruihhloah kal a awm bik thu sawiin, "Kan ṭhalaite'n kut hnathawh kan uar a ṭul ta khawp mai," a ti bawk.