CM thusawi mi bumnaah ngai

Congress ṭhalaite chuan thuchhuah siamin, chief minister Lalduhoma'n an sorkar ṭan aṭanga ni za chhunga tihhlawhtlin tur a puante tihhlawhtlin a nih thu kumin Independence Day lawmna, August 15-a a sawi chu mipui bumna niin an tarlang.

MPYCC chuan, December 8, 2023-a chief minister atana lak luh Lalduhoma'n chanchinbumite a kawmnaah ZPM sorkarin ni 100 chhunga an tih tur point 12 a puang a, thlai thar leina tur cheng vbc 110 dah a nih thu phûr takin sawi tih an tarlang a, "Ni 100 chhunga tih tur a sawi hnuaia project-te chu March 31, 2024 chhunga tihhlawhtlin tum thu February 27, 2024-a a sawi chu August 15, 2024 khan I-Day lawmnaah tihhlawhtlin a nih thu a sawi a, hei hi mipui bumna a ni," an ti.

Kumin I-Day lawmnaah, thlai thlan bikte hlâwk zawka hralh a nih theih nana hma la tur Agricultural Market Assurance Fund Management Board (AMAFMB) din a nih thu leh budget revised estimate 2023-24 angin Agricultural Market Assurance Fund atan hian cheng vbc 110 dah tawh a nih thu CM-in a sawi tih MPYCC chuan an tarlang a, "Cheng vbc 110 hian Agriculture Market Assurance Fund (thlai thar support price atana dah) aṭangin thlai thar eng mah lei a ni lo," an ti bawk.