KHAWTHLIR

Thisen pe

Sairang Higher Secondary School NSS unit chuan nimin khan Civil Hospital, Aizawl blood bank-ah thisen unit 9 an pe a, petute mipa pariat leh hmeichhia pakhat an ni.

ZMC-ah ṭhukhawm

Zoram Medical College-ah tun hnai khan ZMC hotute leh Indian Council of Medical Research (ICMR) Headquarters, National Institute of Cholera and Enteric Diseases leh CDAC Kolkata mithiamte an ṭhukhawm. 'Surveilliance of Foodborne Pathogens in NE India Project' chungchang - ei leh ina natna thlentu natna hrikte chak zawka chhui chian leh Mizorama ei leh in vanga natna awm ṭhin chungchang te, hetiang lama Mizoram sorkarin hma a lak dante sawiho a ni.

Traffic awareness

Siaha District Transport Office leh MADC sorkara Road Transport department chuan nimin khan Siaha Council Vaih Multipurpose Hall-ah Traffic Centric Awareness programme an buatsaih. Awareness hi Siahaa taxi leh auto-rickshaw khalhtute leh zirlaite puala buatsaih a ni a; Motor Vehicle Inspector (MVI), Rules of the Road Regulations 1989 bakah, kawng kân dawna hriat tur ṭul leh pawimawhte inzirtir a ni.

Hâlpuah khap

Aizawl District Magistrate chuan thupek chhuahin, Diwali, Krismas leh kumthar vuakvetah Aizawl district chhungah hâlpuah, hâlmawi leh meithallàwnte lak luh, zawrh, hralh, hâl leh hman khap a nih thu a puang. Thupêk hi chuuah aṭanga thla hnih chhung awh tur a ni a, bawhchhiate chu BNS Section 223 hmanga hrem theih a ni. Thupêk hi mipuite'n him leh dam taka hunpui an hman theihna tura tihchhuah a ni.

Goa-a spa therapy zir turte thlah

Mizoram Youth Commission leh Bharat Hotels, New Delhi thawhhona kaltlanga spa therapy zir tura thlan mi pasarihte chu nimin khan MYC conference room-ah MYC chairman Malsawmzuala Ralte hoin thlahna hun hman a ni. Mi pasarihte hian vawiinah Aizawl chhuahsanin Goa an pan dawn a, Goa-ah thla 18 chhung an inzir dawn a ni.