SSA-a thawkte'n thla li hlawh an la lo An hlawh tur sorkarin nuai 3,464.04 a bá
Mizorama Sarva Shiksha Abhiyan (SSA) hnuaia thawk zawng zawng, mi 4,245-te chuan thla li hlawh an la tawh lo a, an hlawh tur sorkarin a pek loh zawng zawng chu cheng nuai 3,464.04 a ni a, an ni. Thla li chhung hlawh an lak tawh loh avangin SSA-a thawkte chu an mangang tawh hle nia thu dawn a ni.
Vanglaini palai zawhna chhanga Finance department hotute sawi danin, Mizoram SSA-a thawkte hlawh tur hi SSA aṭangin dilna an dawng tawh a, file a kal kual mek a ni. Sorkar kum tharah March leh April thla hlawh a rualin April thlaah pek ṭhin a ngaih avangin thil tih zung zung a harsa a ni.
Finance hotute chuan, sorkar laipuiin pawisa an la rawn pek tam loh avangin SSA-a thawkte hlawh bakah, thil dang dangah pawh sorkar sum báwm aṭangin pawisa pek chhuah tam tur a la awm lo niin an sawi a; SSA-a thawkte hlawh tur chu K-Deposit-ah a awm mek nia sawiin, pek chhuah theih hun tur hriat a ni lo a, sum an neih veleh a rualin pek chhuah a nih tur thu an sawi a ni.
Finance department hotute chuan, "Ṭum khata Treasury-in pawisa a pek chhuah zat turah chuan buai a ngai lo ang, SSA-a thawkte hlawh hi tam mah se, sum kan neih velah a hlawma pek phalna kan ziak ang a, vawi khatah pek chhuah nghal mai tur a ni ang," an ti.
Thu dawn danin, SSA-a thawk, primary school-a zirtirtute chu mi 550 an ni a, mi pakhatin Rs. 20,000 zel an hlawh a, thla li chhunga an hlawh lak tur zawng zawng chu cheng nuai 440 a ni. Upper primary (middle school)-ah SSA zirtirtu 1,643 an awm a, mi pakhatin Rs. 25,000 an hlawh a; thla li chhunga an hlawh lak tur belhkhawm chu cheng nuai 1643 a ni.
Art education instructor mi 410 an awm a, mi pakhatin Rs. 20,000 an hlawh a, an thla li chhung hlawh táng zat belhkhawm chu nuai 328 a ni a; health & physical instructor-in thla khatah Rs. 20,000 an hlawh a, instructor 404-te thla li hlawh lak tur belhkhawm chu nuai 323.20 a ni.
Block Resource Centre-a thawk mi 326 an awm a, chung mite thla khata an hlawh belhkhawm chu nuai 80.20 a ni a, an thla li hlawh belhkhawm chu nuai 320.80 a ni. Cluster Resource Centre-ah hian mi 171 an thawk a, thla li chhunga an lak tur chu nuai 171 a ni.
Inclusive Education-ah thawktu 28 an awm a, thla li chhunga an hlawh belhkhawm chu nuai 15.44 a ni a; Special Training-ah thawktu 345 awmin, thla li chhunga an hlawh belhkhawm chu nuai 83.52 a ni. Residential Hostel-ah thawktu 97 awmin, thla li chhunga an hlawh lak tur chu nuai 33.52 a ni a; Management Cost-ah thawktu 271 awmin, an thla li hlawh belhkhawm chu nuai 106.08 a ni bawk.
Heti hian SSA-ah thawktu chi hrang 10 awmin, an vaiin mi 4,245 an ni a; an zavaia thla li chhunga an hlawh lak loh zat chu cheng nuai 3,464.04 a ni.
SSA-a thawkte hi sorkar chuan November 2014 thleng hlawh a pe a, December 2014 aṭanga March 2015 chhung hlawh a la pe lo. Thawktute hlawh tur hi Finance dept.-in a pek chhuah hunah SSA account-ah a lut ang a, SSA account aṭangin district tina SSA account-ah dah luh leh nghal tur a ni.