SRS-in mi 143 an khawm tawh

Central YMA hnuaia SRS-te chuan Aizawl khawpuiah April 11, 2015-a ruihhlo do beihpui an thlak ṭan aṭanga nimin zing thleng khan mi 143 an khâwm tawh.

CYMA thuchhuah tarlan danin, khawlaia awm ṭha duh lo leh ruihhlo vanga an man khawmte zing 86 chu mipa an ni a, 57 chu hmeichhia niin, tuai pathum an tel. No. 4 vangin mi 104 an man a, hmeichhe awm ṭha duh lo pasarih leh ruihhlo ngai leh thil ṭha lo dang ti mi 31 an man bawk.

SRS-in mi an khawmt­e chu an awmna branch YMA hruaitute hrilhin, an in lamah an hruai haw ṭhin. YMA branch hruaitute'n an hruai haw remchang lo mi pariatte chu home-ah dah an ni a, New Life Home Society Jeriko-ah paruk leh Protective Home, Hunthar Vengah pahnih dah an ni.

SRS hmalaknaa a ṭula hman atan Dawrpui Presbyterian Kohhran Hmeichhe Committee chuan Rs. 5,000 leh College Veng branch YMA-in Rs. 2,000 an pe.