HPC(D) mi 3-te jail-ah dah lut

April 16, 2015-a Mizoram police-te'n Silchar-a an man HPC(D) mi pathum - Lalropuia Famhoite, Norbar Sanate leh Ngur­thantluanga Sanate chu nimin khan Aizawl chief judicial magistrate (CJM) phalnain Central Jail-ah dah luh an ni. HPC(D) army chief Lalropuia Famoite chuan, Zokhawthiang dáia MLA pathum leh anmahni zuitute lambun chu an hriatpui loh thu CJM Sylvie Z Ralte an hrilh.

HPC(D) mi leh sa pathumte hi August, 2014-a New Vervek leh Ratu khawtlang hruaitute telephone hmanga bia a, retailer-te hnena pawisa khawn tura tih an nih chungchangah thubuai siamsak an ni.

CJM zawhna chhangin Lalropuia Famhoite chuan, tukluih chiah pe tura tih chungchang chu HPC(D) mi leh sate tih a nih ngei a rin thu a sawi a, "Engmah kan hriatpui lo a, an commander ho tih a ni ang," a ti. Tukluih chhiah hi police-te chuan HPC(D) i/c Finance hmanga khawn a nih thu an ziak lang a, mahse, i/c Finance Norbar Sanate chuan a hriatpui loh thu Court a hrilh thung.

Zokhawthiang daia MLA leh anmahni zuitute lambun an ni chu an hriatpuinaa tih a ni lo nia sawiin Lalropuia Famhoite chuan, "Commander power-a tih a ni ang, in­formation engmah min pe lo. Kei chu ka dam loh aṭangin ka che chhuak thei tawh lo hrim hrim," a ti.

CJM chuan police-te dilna angin HPC(D) mi pathumte hi Central Jail-ah dah a phalsak a, nimin vek khan Central Jail-ah dah an ni. Police aṭanga thu dawn danin, HPC(D) mite hi thubuai dang pawh siamsak leh zel tum a ni.