Hmun 3-ah fly-over bridge siam tum a ni Dodalna avangin hnathawh chak a har: AMC

Aizawl Municipal Council (AMC) chairman CT Zakhuma chuan, Aizawl khawpui chhungah fly-over bridge hmun pathumah siam a nih dawn thu a sawi. Hetih lai hian AMC hotute chuan, an hmalakna hrang hrangah dodaltu an awm ṭhin avangin hna thawh chak a har ṭhin thu an sawi.

AMC bultuma Shimla Mu­nicipal Corporation (SMC) zir chiangtu MJA member-te'n nimina Aizawl Press Club-a report an peknaah thu sawiin CT Zakhuma chuan, "Fly-over bridge siam kan tum ṭhin a, mahse harsatna a awm leh ṭhin. Steel structure hmangin a siam theihin kan hria a, tunah hian hmun pathuma siam turin quotation koh mek a ni. Inthlan hi a zawh fel chuan hna ṭan theih kan beisei," a ti.

CT Zakhuma chuan, Mizote hnathawh dan ṭhin tihdanglam an tum tih sawiin, "Contract hnaah 30% vel sum sêng a, a bâk zawng hlêp tum a ni ṭhin. AMC chuan hei hi thlak hlawk a duh a, 70% vel hmanga hna thawh a, 30% vel hlêp tura hna thawhtir kan tum a ni," a ti a; AMC hnathawh chu mihring inan loh avanga chhe deuh awm mah se, a tlangpuiin a ṭha thawkhat tih a sawi.

AMC Chairman sawi danin, AMC chu Property Tax la turin a inbuatsaih mek. Property Tax hi thil thar a ni lo a, Revenue department-a leiman pek ṭhin a, Building Tax pek tel ngai ṭhin chu Property Tax tia thlak a ni. Hmun tam takah chuan Building Tax-a chawi ngai ṭhin aiin Property Tax-ah chawi tur a tlem zawk dawn a ni.

Property Tax lak a nih avangin in luah man a sang tur anga inzirtirna awm chu ṭha lo a tih thu sawiin, CT Zakhuma chuan, "Property Tax lak a nih hma pawhin in luah man tihsan a ni ṭhin. Property Tax lak a nih avangin in luah man a san phah lo turah kan ngai," a ti.

AMC hotute chuan, an hmalak­na tur hrang hrangah dodaltu an awm ṭhin thu sawiin, "Hmasawnna tur thil kalpui dawnin dodaltu an awm zel ṭhin avangin hmalakna a muang a; property tax hmangin pawisa kan la lut ang a, chu chuan khawpui kan chei thei dawn a ni," an ti a; sorkar laipui aṭanga an sum hmuh a tlem zel avangin AMC-in hna thawhna tur pawisa a mamawh thu an sawi.

MJA president Vanlalrema Van­tawla chuan khawpuiin enkawltu a mamawh tih sawiin, "Khawpui hi enkawltu mumal an awm loh chuan a chhunga chengte'n an tuar a, a hrehawm ṭhin. Khawpui enkawltu tur AMC din a ni ta hi a lawm tak zet a ni," a ti a; khawpui tana ṭha turah chuan huaisen takin AMC-te kal zel se a duh thu a sawi.

Report pek inkhawm hi MJA vice president Zonunsanga'n a kaihruai a; MJA secretary Lalhma­chhuana'n zin report a pe a, AMC executive councillor pahnih - Rosiamngheta leh Lalzirliana te pawhin thu an sawi a ni.