KHAWTHLIR
Thisen pe
Darlung pastor bial KṬP-te chuan nimin khan Darlung Kohhran hall-ah blood donation camp an nei a; Synod Hospital-ah thisen unit 53 an pe a, a petute hi mipa 50 leh hmeichhia pathum an ni.
Rel kawng sawiho
North East Frontier Railways hotute leh Kolasib DC Jitendar Yadav te chuan nimin khan Kolasib DC pisaah Bairabi leh Sairang inkar rel kawng siam mek dan an thlirho. Ruahman dan chuan, ram lakte chu May 2015-ah NE Frontier Railways kuta hlan hman tura tih a ni a, rel kawng siamna atana ram la tihfel loh ṭhenkhat chu enfiah nawn leh ni se, an ti.
Lungleiah bandh
MSU regional headquarters, Lunglei huaihawtin nimin zing dar 6 aṭang khan Lungleiah tiamchin awm loin bandh an huaihawt a; Lungsen leh Chawngte-ah bandh an huaihawt bawk. Bandh huaihawt chhan hi sikul kai hun sawn hma an duh loh vang a ni.
New Latawh en
Saiha bialtu MLA Dr K Beichhua leh GAD Aviation Wing principal consultant Wg.Cdr. Lalzawma te chuan nimin khan thlawhtheihna ṭumhmun atana Saiha district-a New Latawh ram a hman theih dawn leh dawn loh an enfiah. Mizoram sorkar chuan chhim lamah thlawhtheihna ṭumhmun dah a duh a, Kawmzawl leh Mampui ramte pawh enfiah a lo ni tawh a ni.
Zir tan
Nausen thi zat tehna, Infant Mortality Rate (IMR) leh raicheha thi zat tehna Maternal Mortality Rate (MMR) chungchanga Saiha district dinhmun zir chiangtu tur Indian Council of Medical Research (ICMR) tirh scientist pathumte chuan Pathianni khan Saiha an thleng a; nimin khan health worker, ASHA leh NGO aiawhte thil pawimawh an zirtir.
Nausen thiin chhar
Nimin zing dar 8:30 vel khan Ramhlun Vengthar mawng lama ke-a kalna kawngah mipa nausen piang hlim nia rin thia chhar a ni. Nausen ruang hi a chhe tawh hle.