Aizawl Civil Hospital-in thisen a nei tlem AVBD-in thisen pe turin thalaite an ngen

Aizawl Civil Hospital (ACH) Blood Bank chuan tunlai hian thisen an nei tlem hle a, thisen petu zingah a thlawna pe aiin, thisen rulh nana pe (replacement donor) an tam zawk. Hetih lai hian, Association for Voluntary Blood Donation (AVBD) chuan thisen pek uar lehzual turin ṭhalaite an ngen.

Vanglaini palai zawhna chhangin, ACH blood bank officer-te chuan, tunlaiin blood donation camp an nei tam theih loh avangin thisen kawl sa an neih tlem hle tih an sawi a, "Thisen pe tura appointment kan siampui tawh pawl zingah ṭhulh leh ta thut an awm nual a, hei vang hian donation camp kan neih tam theih loh phah a ni," an ti.

ACH blood bank hotute sawi danin, tunlai hian thisen kawl sa unit 100 vel chauh an nei a, hun dangah chuan a tlem berah unit 300 vel tal an nei ṭhin. A tlangpuiin ni khatah unit 50-70 an pe chhuak a, thisen an neih tlem avangin blood group pawh a awm kim lo fo a ni.

Tun hnaiah voluntary donation aiin replacement a tam zawk tih sawiin, ACH blood bank officer-te chuan, "Replacement hi kan ti char char a, tih loh theih a ni lo," an ti a; March 2015-ah khan voluntary donation chu 50% vel a ni a, April-ah chuan replacement tam zawk hle tih an sawi.

ACH Blood Bank-in thisen an neih tlem avang hian AVBD chuan mimal leh pawl anga thisen pe zel turin Mizo ṭhalaite an sáwm a, "Thisen hi siam chawp theih a ni lo a, a mamawhtu an tam em em reng a, petu an awm loh chuan thisen mamawhte'n dawn tur an nei dawn lo a ni," tiin, thisen pek uar zel turin mi tinte an ngen a ni.

ACH Blood Bank-ah hian kum liam ta, April 2014 - March 2015 chhung khan thisen unit 11,396 pek a ni a, chung zinga unit 8,618 chu a thlawna pek niin, voluntary donation percentage chu 75.62% a ni. Blood donation camp ṭum 144 an nei hman a, chutah chuan thisen unit 5,472 pek a ni. Kum hmasa, 2013-14 ah erawh chuan thisen pek zat (unit 9,321) tlem zawk mah se, voluntary donation a sang zawk a, voluntary donation chu 95.51% (unit 8,893) a tling a ni.