Lunglei MJA-in lawmthu an sawi

MJA Lunglei district chuan nimin khan Lunglei district High Powered Committee vice chairman S Laldingliana chu a inah an hmu a, Arunachal Pradesh-a press tour a buatsaihsak leh Lunglei Press Club sak chhunzawmna tur pawisa a pek vangin lawmthu an hrilh a, Arunachal aṭanga thil an hawnsakte an hlan nghal.

S Laldingliana chuan, tunlaia India leh China inkar boruak kal mek avangin India sorkarin ram venhimna tura rua­hmanna a kalpui mekah Lengpui Airport chu jet fighter 10 tal dah theihna tura tih a nih thu a sawi a, "India sorkarin a tih tawh chuan Mizoram sorkarin sawi theih kan nei lo a, jet fighter 10 awm theihna tura Lengpui Airport buatsaih chu kan tih tur ni a mai," a ti.

Theiriat ram, Tlawng lui hnâr Zopui tlanga Defence Ministry-in Radar Station bun a tumte pawh dodal chi a nih loh thu te, Pukpui rama Indian Air Force air base siam tumte pawh dodal chi a nih loh thu a sawi a; dodal lo a, a hlâwkna an chan ve theihna tura ṭan lak a pawimawh zawk thu a sawi a ni.