MZP-in hnam dang dawr 4 an khârsak

MZP chuan nimin zing khan Aizawlah dan loa hnam dang sumdawngte dap hnatlang ṭum ngana an nei a, hnam dang dawr pali an khârsak.

MZP-te hi Zemabawk leh Bawngkawn huam chhungah hnatlangin, hnam dang dan loa sumdawng an awm leh awm loh an enfiah a; dan loa hnam dangin dawr an siam pali an khârsak a ni. MZP hian hnam dang dan loa sumdawngte enfiah hna­tlang hi March 2015 aṭang an nei ṭan a, dan loa hnam dangin dawr an siam 24 an kharsak tawh a ni.

MZP chuan, hnam dang dan loa sumdawng an dap avang hian hnam dang dawr ni si, Mizote'n an dawr anga an lo chhàl a tam hle niin an sawi a; dawr eng emaw zat, Mizote'n an dawr anga an chhàl chu a neitu dik tak hnam dangte'n hlawh neiin an ruai nia sawiin, "Hnam dang dawr mahni ta anga lo chhàl hi hnam phatsanna a nih avangin hnam dang dawr mahni ta anga chhal lo turin Mizo mipuite kan ngen a ni," an ti.

MZP thuchhuah chuan, Mizoram chhunga dan loa hnam dang sumdawngte an enfiah zel tih tih a tarlang a; he an hmalaknaah hian thláwp vek turin Mizo mipuite an ngen a ni.