Climate change ven dan tur sawiho

Mizoram State Climate Change Executive Council chu nimin khan an chairman, chief secretary Lal­malsawma hoin CS Conference Hall-ah an ṭhukhawm a, sik leh sa a chhe zawnga danglam zela hmalak dan tur an sawiho.

Lalmalsawma chuan, sik leh sa danglam nasa lutuk ven nan leh chu mi mila eizawnna ngêlnghet leh tluan­tling nei tura ṭan lak a pawimawh thu sawiin, "Mizoram State Action plan for Climate Change siam peih a ni tawh a, department hrang hrangte thawhhona ṭha tak neih a pawimawh. Sik leh sa danglam chakin mi tin min nghawng avangin a ven nan theihtawpa hmalak a pawimawh. Vawi leh khata hmalakna lian tham neih nghal a rem loh avangin zawi zawia tun aṭanga kan tih theih tâwk tê tê-a awmze nei taka hmalak a ṭul a ni," a ti.

Chief scientific officer Dr RK Lallianthanga chuan, project hrang hrang buatsaih leh a la nih tur thu sawiin, "Tunah chuan Ministry of Environment & Forest and Climate Change-ah report pali thehluh a ni tawh a, project proposal dang thehlut tura inbuatsaih a ṭul," a ti.

Meeting-ah hian Planning & Programme Implementation, Environment & Forest, PHE, Agriculture, Rural Development, Horticulture leh Tourism department secretary-te bakah Science & Technology directorate officer-te an tel a ni.