Clinical Establishment Act chungchang zirho

Nimin khan Health Directorate conference hall-ah Clinical Establishment (Registration & Regulation) Act, 2010 zir chianna buatsaih a ni a, Health principal director Dr K Ropari'n a hmanpui. Sorkar tarlan danin, Clinical Establishment Act hnuaiah hian Mizorama damdawi-in leh clinic din turte'n registration felfai taka an neih a ngai dawn a ni.

Dr K Ropari chuan, Mizoramin Clinical Establishment Rules a neih theihna tura zir chiang a, theihtawp chhuahtute chungah lawmthu a sawi a, "Mizoramin drugs policy mumal kan la neih loh avangin harsatna kan tawk ṭhin. Hman theih mai tura he Rules chhawpchhuah a lo ni hi hlawhtlinna ropui tak a ni. Hman a nih hun chuan mipuite pawh kan him tawh dawn a ni," a ti.

Workshop-a tarlan danin, Clinical Establishment (Registration & Regulation) Act 2010 hi sorkar laipuiin state pali - Arunachal Pradesh, Himachal Pradesh, Mizoram, Sikkim leh Union Territory-te hman tura a siam a ni a; Gazette of India-ah August 19, 2010 khan tihchhuah a ni.

He dan hi sorkar laipui chuan March 1, 2012-a hmang ṭan turin February 28, 2012-ah notification a tichhuak a; mahse, Mizoram-ah chuan a kaihhnawih dan duan a ngaih avangin hman ṭan nghal theih a ni lo.

The Mizoram Clinical Establishment (Rules & Regulation) Rules 2014 chu June 6, 2014 khan Mizoram gazette-ah chhuah a ni a, Act-in a phut angin Rules chu Legislative Assembly-ah December 2014 khan pharh a ni. Clinical Establishment (Registration & Regulation) Act 2010 hmang tur hian Mizoram sorkar a inbuatsaih mek a, a tahtawlin Mizoram tuam chhuah tum a ni.