COVID-19: Mizoram dinhmun Hripui vei 32 hmuh belh a ni

December 7, Thawh­ṭanni khan Mizoramah Covid-19 vei mi 32 hmuh chhuah a ni a, nimin khan mi pasarih chhuahtir an ni thung.

Covid-19 vei hmuh chhuah tharte chu mipa 20 leh hmeichhia 12 an ni a; ZMC laboratory-a hmuh mi 11, TrueNAT-PCR hmanga hmuh mi pasarih leh Rapid Antigen Test (RAT) hmanga hmuh mi 14 an ni.

Nimin khan hripui laka fihlim tawh mi pasarih chhuahtir an ni a; SRH-ZMC aṭangin mi pali leh Lawngtlai CCC aṭangin mi pathum an chhuak a ni.

Mizoramah Covid-19 positive mi 3,968 hmuh chhuah a ni tawh a, mipa 2,922 leh hmeichhia 1,046 an ni. Nimin tlai dar 5 thleng khan mi 3,764 (94.86%) chhuahtir an ni tawh a, mi paruk (0.15%) thi tawhin, enkawl mek mi 198 (4.99%) an awm.

Mizorama Covid-19 positive hmuh chhuah tawh mi 3,968 zinga mi 1,873 chu Mizoram chhunga kái an ni a, mi 2,095 chu state páwn aṭanga rawn lût an ni.

December 7, Thawhṭanni khan Mizoramah swab sample 1,552 endik a ni a, ZMC-ah mi 565, TrueNAT-PCR hmangin district pakuaah mi 224 leh RAT hmangin district 11-ah mi 763 endik a ni. Mi 1,552 zingah Covid-19 positive mi 32 an awm a, mi 25 chu Mizoram chhunga hri kái an ni.

Sorkar thuchhuah aṭanga a lan danin, Covid-19 positive hmuh thar, tualchhunga kai mi 25 zinga pahnih chu hri an kài ṭanna hriat a ni lo a, natna (symptom) lang chhuak pakhat a awm.

TrueNAT-PCR hmanga Kolasib-a hmuh chhuah pakhat, 1st IR police chu Bihar inthlana duty zinga mi a ni a, a haw hlimah RAT-ah a positive avangin CCC-ah enkawl a ni. December 2 khan RAT hmanga test leh niin, a negative avangin CCC aṭangin chhuahtir a ni a, RAT negative a nih avangin a chhuah hnuah mahni sum séngin TrueNAT-PCR hmangin swab sample a endiktir leh a, a positive a ni.

ZMC laboratory-a Covid-19 vei hmuh chhuah mi 11-te chu mipa paruk leh hmeichhia panga, Aizawl district-a sample lâk vek an ni a, kum 17-64 inkar an ni. An zingah tualchhunga kai mi pariat an awm a, mi pathum chu state páwn aṭanga lut an ni thung.

TrueNAT-PCR hmanga hripui vei hmuh chhuahte chu mipa panga leh hmeichhia pahnih an ni a, nausén thla 9 mi bakah, naupang kum 5, kum 8 leh kum 13-te an tel. An zinga panga chu tualchhunga kâi an ni a, pahnih chu state páwn aṭanga ráwn lut an ni.

RAT hmanga hmuh chhuah mi 14-te chu mipa pakua leh hmeichhia panga an ni a, naupang pathum telin, a naupang ber chu kum 4 a ni. An zingah tualchhunga kái mi 12 an awm.

Chaltlang - 2: Mipa kum 44, hmeichhia kum 56. An chhungte zinga +ve awm tawh, symptom nei lo ve ve.

Dawrpui Vengthar - 5: Mipa kum 17 & 63, hmeichhia kum 36, 40 & 64. Tualchhunga kái, an chhungte zinga +ve hmuh tawhte aṭanga kai nia hriat, symptom nei lo vek.

Khatla - 1: Hmeichhia kum 28, tualchhunga kái, kài ṭanna hriat loh, symptom nei.

Bawngkawn - 1: Mipa kum 45, West Bengal aṭanga rawn lut, Railways-a thawk. Quarantine facility-a awm mek, symptom nei lo.

Falkawn - 1: Mipa kum 28, Assam aṭanga haw, quarantine facility-a awm mek, symptom nei lo.

Zokhawsang - 1: Mipa kum 41, Assam Rifles sipai, Assam aṭanga lut, quarantine facility-a awm lai, symptom nei lo.

Thenzawl - 5: Mipa kum 5, 8 & 13 leh hmeichhia thla 9 & kum 57. PTS, Thenzawla awm December 6-a hmuh chhuah tawh chenpuite an ni.

Thingdawl - 1: Mipa kum 35, 1st IR police, Bihar inthlana duty zo rawn haw. RAT-ah a +ve avangin CCC-ah enkawl a ni a, December 2-a RAT hmanga endikah a -ve avangin CCC aṭangin chhuahtir a ni. A chhuah hnuah mahni sum séngin TrueNAT-PCR hmangin swab sample a endiktir leh a, a +ve si a ni.

BSF, Melte - 1: BSF sipai kum 32, 19 Bn BSF camp, Lunglei Zotlanga khung hran mek, symptom nei lo.

Ramhlun South - 1: Mipa kum 23, zin chhuah tum vanga private hospital-a RAT hmanga sample endik; hri kaina hriat loh, symptom nei lo.

Lengte - 1: Mipa kum 47, Kolkata aṭanga haw, Lengpui Airport screening point-a hmuh chhuah, symptom nei lo.

Tuirial - 1: Hmeichhia kum 24, Chandigarh aṭanga , Lengpui Airport-a hmuh chhuah, symptom nei lo.

Lunglei Lunglawn - 2: Hmeichhia kum 4, mipa kum 30. Hri kaina hriat, symptom nei lo.

Lunglei Venglai - 1: Hmeichhia kum 37, kài ṭanna hriat, symptom nei lo.

Lawngtlai AOC Veng - 2: Mipa kum 27 & 58. Hri kaina hriat, symptom nei lo.

Council Veng - 3: Mipa kum 47, Hmeichhia kum 11 & 43. Hri kaina hriat, symptom nei lo vek.

Thingkah - 2: Mipa kum 16 & 18. Hri kaina hriat, symptom nei lo ve ve.

Paithar - 1 : Mipa kum 35 mi a ni a. Positive contact atanga hri kai, symptom nei lo a ni.