Mizoram-Assam Home Secy-te inbia Bungraw luh hun tur a la hriat loh
Assam leh Mizoram ramri buai avanga tun hnaia Lailapur-a mi ṭhenkhatin Mizorama lut tur bungraw phur an dan chungchangah nimin khan CIJW Garison, Lailapur-ah Mizoram Home Secretary leh Assam Home Secretary an inbia. Heti chung hian, Assam aṭanga bungraw rawn luh theih hun tur hriat a la ni lo.
Inbiaknaah hian Mizoram aṭangin Home secretary Lalbiaksangi, IGP (Law & Order) LH Shanliana, DIG Lalbiakthanga Khiangte, Kolasib DC Dr H Lalthlangliana leh SP Vanlalfaka te an tel a; Assam aṭangin Home secretary GD Tripathi, special DGP (Border) Mukhesh Agarwal leh Cachar leh Karimganj district-a DC leh DFO-te an tel.
State pahnih official-te inbiaknaah hian Assam lam thuneitute chuan, Lailapur bul hnaia Mizoram police leh IR sipai duty-te chu hnuhkîr an phût thu an sawi. Mizoram aṭanga official kalte chuan, boruak a rálmuan hma chuan hnuhkîr theih an nih loh thu an sawi thung. Ramri chungchang bik erawh chu inbiaknaah hian sawi lan a ni loa thu dawn a ni.
Ṭhutkhawmah hian, boruak rálmuang a awm theih nan state pahnihin hmalak dun te, inpawh lehzualna a awm theih nan ramria district pahnihte thla tin vawi khat tal video conference hmanga inkawmte leh, thla thum danah a taka inhmuha inkawmte an rêl. Meeting zawhah Bagha piah lama lirthei tangkhangte an enfiah nghal a ni.
Lailapur Forest Beat office-a thuthar thehdarhtute an kawmnaah Assam Home Secretary chuan, Lailapur-Vairengte kaltlanga bungraw phur lirthei tluang taka a kal theih nan state pahnih thuneitute'n venhimna an pek theih thu a sawi a, "Mipuite pawh kan be dawn. Mahse, lirthei kal theih hun erawh a sawi theih rih loh," a ti.
Phaisen-Dholchhora inkar kawng Assam lamin an hung leh an laih chhiat chungchanga zawhna chhangin GD Tripathi chuan, Assam state sorkarin a enfiah tur thu a sawi.
Assam media-te'n Assam state chhunga Mizoram sorkarin force mi a dahte engtikah nge a hnuhkîr dawn, tia an zawhna chu Home secretary Lalbiaksangi chuan, "Mizoram sorkarin Assam state chhungah sipai a dah lo a, Mizoram chhungah chauh, mipui himna turin a dah," a ti.