Thlipui tlehin electric line tichhe nasa Kawlphetha awm kim hun tur a hriat loh
Thawhṭanni zan dar 9 vela thlipui tleh leh ruahsur avangin Mizoram hmun tam takah kawlphetha pek chhuahna a chhia. Mizoram hmun eng emaw zatah Thawhṭanni zan aṭang khan kawlphetha pek chhuah theih a ni lo.
Vanglaini palai zawhna chhangin, Power & Electricity department hotute chuan, kawlphetha pekna chhiate chu hmun ṭhenkhatah an siamṭha nghal a, a zavaia an siam theih hun tur hriat a ni lo tih an sawi. Hetihlai hian Aizawl hmun ṭhenkhatah chuan nizan dar 6 vel khan eng pek theih a ni.
P&E department hotute chuan, kawlphetha pek chhuahna hmun chhiate siamṭha turin theihtawp an chhuah nghal tih sawiin, "Engmah sawi lâwk theih a awm lo. Zanin (nizan) lamah chuan hmun ṭhenkhatah chuan êng pek theih kan beisei. Line chatte hi chu thil dang a chhia a nih loh chuan siamṭhat theih thuai ka inbeisei a, ban tlu a tam avangin siam hun chhung a rei deuh lo thei lo. A vaia siamṭha tur chuan rokhawlhna dang a awm a nih loh chuan ni 2/3 vel a la ngaih a rinawm," an ti.
Electric ban tlu zat an la hriat theih loh thu sawiin, P&E department hotute chuan, "A theih ang ang siamṭhat hna kan thawk nghal zel a ni," an ti a; chhia a tam avangin mihring an indaih loh thu an sawi.
P&E department hotute chuan, kawlphetha pek chhuahna atana an thil hmante chuan thli pui na tak chu a dâwl zawh loh thu sawiin, "Kan hmanraw ṭhenkhatte hi kum 10 velte an ni tawh hlawm. Mipuiin min hrethiam khawpin kan hria a, mipui lamin min rawn zawh ber chu êng awm loh chhan leh a awm hun tur a ni ber. A bak chu mipui lam aṭanga nawrna leh complaint kan dawng lo," an ti.
Telephone hmanga biak tum an tam lutuk chu hna an thawhnaa an harsatna tawh pakhat a nih thu sawiin, P&E hotute chuan, "Telephone hmanga tih tur inhrilh zung zung a ngai a, telephone a busy nasat avangin hna thawh chak a har phah hle," an ti a; tun hnuah chuan eng emaw harsatna a thlen chuan telephone hmanga inbe buai lo a, hna an thawk nghal a ni tih ring ngam turin mipuite an ngen a ni.
Thliin a tihchhiatte
• 32kV line Zuangtui to Saitual/Champhai (khawchhak lam pekna)
• 132kV line Zuangtui to Serchhip/Lunglei/Saiha (chhim lam pekna)
• 33kV line Zuangtui to West Phaileng/Mamit/Bairabi (khawthlang lam pekna)
• 33kV line Zuangtui to Aizawl Power House (Aizawl hmar lam leh khawpui laili pekna)
• 33kV line Luangmual to Chawnpui (Aizawl tlak lam pekna)
• 33kV line Chawnpui to Tlangnuam (Aizawl chhim lam pekna)
• 33kV line Tlangnuam to Aibawk (Chhimphei tlangdung pekna)
• 33kV line hnuai lam 11kV line leh LT line Aizawl hmun tam takah a chhia a, a chhiat dan dik tak chu 33kV line a ṭhat kim hma chu hriat kim theih a ni lo.